Atsagrīzšona saimis lygzdā mādz izavērst par emocionalim amerikaņu kaļnenim, eipaši situacejuos, kod itaidys sasatikšonys nūteik reši. Kod Skots i Eimija brauc gostūs pi sova tāva, jī paradz, ka jis varātu byut drupeit vīntuļš. Tok jī nicik nagaida, ka tāvs byus atrads sev kompaneju, kluotyn vēļ – pavysam naparostu… Tāva kompanjonis byušona kluotyn saimis sātā līk bārnu motim sasaceļt stuovus i beidzūt dagrīzt skatīni nu sovu iz cytu vajadzeibom.
Izruodis pamatā ir vīna nu jaunuokūs dramaturga Pītera Kviltera lugu, i tys jau ir ūtrys ituo autora lugys īstudiejums Daugovpiļs teatrī - da šam skateituoji varēja īpasazeit ar dramaturga rūkrokstu izruodē “Snīga giustā”.
Stuostūt par tūpūšū komedeju, režisors Herberts Laukšteins pastreipoj, ka par nūpītnom lītom var runuot ar vīglumu: “Kai ir sacejs Čaplins, muns ideals komedejā, – “kotra dīna, kurā naesi smiejīs, ir pagaisynuota”. Jis muocēja par nūpītnom lītom runuot caur smīklim i caur smaidu. Taipat ari cīši daudzi klasiki, pīmāram, Gogolis i Čehovs. Leidz ar tū es dūmoju, ka komedejis žanrys ir cīši spieceigs. Izalosūt materialu, mani uzrunuoja tymā skortuos temys – vīntuleiba vacumdīnuos i saimis kūpā byušonys vierteiba. Pastuov stereotips, ka bārni ir vacumdīnu bez bādys garants. Tok dzeivis realitate ir taida, ka bārnim ir sovys klopotys i bīži viņ jim nimoz naatlīk laika vacuokim. Kvilters par tū vysu roksta cīši vīgli i ar gaišumu. Taipat itei luga paruoda, ka eistyn īsamīļuojs cylvāks ir cīši smīkleigs cylvāks, kam jis ir drupeit napruoteigs.”
Golvonuos lūmys atveiduotuojs Margers Eglinskis sovu varūni Hariju raksturoj kai sirsneigu veirīti godūs, kurā, nasaverūt iz suopem par nasenejū meiļuotuos sīvys zaudiejumu i tam sekojūšū naaptveramū vīntuleibys sajiutu, ir lela gribiešona dzeivuot i meklēt rysynuojumu, nakreitūt panikā voi dziļā depresejā i seve puormiereigā žāluošonā. Taipat jis atzeimoj: “Izruode byus par saimi i par eistu, syltu mīlesteibu. Tei byus par tū, ka mums nav nivīna cyta, kai poši tyvuokī, i tai pa eistam bāda par mums ir tik jim.”
Izruodis rodūšū komandu veidoj scenografs Aigars Uozuoliņš, kostimu muokslinīks Gatis Timofejevs, horeografe Irina Bogeruka, gaismu muokslinīks Mārtiņš Feldmanis. Lūmuos: Margers Eglinskis, Kristīne Veinšteina, Egils Viļumovs, Jevgenijs Mihailovs i Zanda Mankopa.
Pyrmizruode – 14. martā 18.00 stuņdēs, nuokušuo izruode – 17. aprelī 18.30 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
