Henrika Ibsena 1881. godā saraksteituo luga “Rāgi” atkluoj, kai sabīdreibys aizsprīdumi i dubultī standarti var nūvest pi dramatisku saku. Helēne Alvinga godim ilgi ir globuojuse veira patīsū seju, kab pasorguotu saimis reputaceju, tok niu paguotne suoc ītekmēt ari dāla dzeivi. Helēnei juoizaškir, voi jei beidzūt ir gotova paškiert dālam saimis nūslāpumu veļumu. Tok izaruoda, ka jei nav vīneiguo, kura nazkū globoj.
Helēnis Alvingys lūmu izruodē izpiļdeis Irina Kešiševa, kura atzeimoj, ka dorbs pi ituos daudzsluoņainuos lugys rūsynuojs jai puordūmys par dilemu cylvāka personeiguos laimis i pīnuokuma vydā: “Kotrys nu myusu dzeivē ir sasadyurs ar vaicuojumu: kū padūmuos cylvāki? Voi ir pareizi aizdūt sev itaidu vaicuojumu, ka tu saprūti, ka izalaseišona par lobu cytu redzīņam var izpūsteit tovu dzeivi? Kurā šaļtī pīnuokums i atbiļdeiba palīk par beņdi, kas graun tovu i varbyut i cytu cylvāku dzeivis?”
Režisors Terje Skunsengs-Naudērs, kuram tys byus pyrmais īstudiejums Latvejā, skaita, ka “Rāgi” ir vīna nu spieceiguokūs Ibsena lugu. Pa jam, varūņu dialogūs ir nūglobuots miļzeigs psihologiskys konflikts: “Izruodis varūni vysu laiku globojās aiz vysaidu masku, nūklusej sovys patīsuos dūmys i jiutys, tok reizē maloj ari poši sev.”
Režisors da šam struoduojs puorsvorā Norvegejis teatrūs, īstudejūt kai laikmeteigū dramaturgeju, tai klasikys dorbus. Juo jaunuokī īstudiejumi topuši Vestlandis teatrī (Teater Vestland; Mārtina Makdonys “Spylvyncylvāks”), Bergenys teatrī “Nacionaluo skotive” (Den Nationale Scene; Juna Fosis “Kaids nūteikti atīs”) i Nordlandis teatrī (Nordland Teater; Viljama Šekspīra “Tits Androniks”).
Izruodis rodūšajā komandā dorbojās scenografs Aigars Uozuoliņš, kostimu muokslinīks Gatis Timofejevs. Izruodē pīsadola Irina Kešiševa, Vladislavs Vasiļjevs, Mihails Samodahovs, Viktors Jancevičs, Alina Kalina.
Izruode byus krīvu volūdā ar tulkuojumu latvīšu volūdā titrūs (mobilajā lītuotnē “Teātru titri”). Ilgums: 2 stuņdis (divejūs cielīņūs). Īsokoma skateituojim nu 14 godu vacuma.
Pyrmizruode – 7. novembrī 18.00 stuņdēs. Nuokušuos izruodis – 8. novembrī i 6. decembrī 17.00 stuņdēs.
Bileti: Daugovpiļs teatra kasē (654 26520), „Biļešu paradīzes” kasēs vysā Latvejā i škārsteiklā www.bilesuparadize.lv.
