“Nauda ir kai būru atslāgs, kas atdora vysys puosoku piļs,” – taida ir Elzys puorlīceiba, kurū jimā īdzynuse muote. Golvyspiļsāta jū vylynoj ar sovom vareibom i iztāluotū dzeivi iz prīšku bez bādys, bet Reiga Elzu sagaida ar dyumuokli, reņgu pīsmokušu ustabeņu i bezdorbu. Naspiejūt pretuotīs skaistys dzeivis sūlejumam, jei apsaprec ar tureigu, bet pavacu fabrikantu Kikuli. Tok dzeive ar jū leidzynojās agruok apbreinuotajom vitrinom – uorejai spūdra, tok tukša i solta. I sirds suoc ilguotīs piec nazkuo eista, piec mīlesteibys…
Muzykla pamatā ir Elīnys Zālītis romans “Agruo ryusa”, kurā atainuota 1930. godu Latveja. Par ituo dorba byutyskuokū vierteibu pīzeits golvonuos varūnis psihologiskais rysynuojums – cylvāka kompromiss ar sovu sirdsapziņu. Romans vaira zynoms piec tuo 1979. goda ekranizacejis, kurā spēlēja Rimante Krilavičute, Oļgerts Dunkers, Ivars Kalniņš, Gunārs Cilinskis i cyti. Jāņa Lūsēna i Pētera Brūvera muzykla “Agruo ryusa” pyrmīstudiejums topa 2007. godā Līpuojis teatrī. Daugovpiļs teatrī tūp ituo muzykla catūrtuo skotiviskuo verseja, kurū uzajiems īstudēt režisors Olegs Šapošnikovs.
“Itū muzyklu poši autori sauc par operu, i tam navar napīkrist, kam kompozicejis ir sarežgeitys i prosa augstuokuo leimiņa meistareibu nu izpiļdeituoju. Partū asam eipaši gondareiti, ka myusu muokslinīki ir sasnāguši leimini, kas ļaun itū dorbu kvalitativi īstudēt. Sūpluok myusu skateituojim jau zynomim izpiļdeituojim izruodē pīsadaleis ari jaunys sejis – profesionali vīssolisti, kai ari vysi pādejūs Daugovpiļs teatra akterkursu absolventi. Prīcynoj, ka muzyklā pīsadola daudz jaunu, talanteigu i universalu muokslinīku, kuri puorlīcynūšai spiej i spēlēt, i dzīduot, i doncuot,” stuosta režisors.
Izruodis rodūšū komandu veidoj solistu vokaluo pedagoge Ilona Bagele, horeografe Irina Bogeruka, scenografe i kostimu muokslineica Inga Bermaka, koncertmeistars Eduards Zariņš, aranžiejumu autors Jānis Lūsēns juniors i gaismu muokslinīks Sergejs Vasiļjevs.
Golvonuos lūmys izpiļdeis solisti Beate Megija Baranovska/Katažina Dudareva (Elza), Sandis Ulpe (Kikulis), Artis Muižnieks (Italo), Maksis Krilovs (Straujups).
Pyrmizruode – 24. janvarī 18.00 stuņdēs, nuokušuo izruode – 25. janvarī 15.00 stuņdēs. Izruode nūteik latvīšu volūdā, tuos ilgums – 3 stuņdis.
Bileti - Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.
