Obeji izruodis “Peiļu medeibys” režisori jau ir struoduojuši kūpā pi cytys Vampilova lugys – “Vacuokais dāls”, kurys pyrmizruode nūtyka 2023. godā. Pīredze da šam, kai ari īprīškejuo dorba panuokumi skubynuojuši īstudēt kūpā vēļ vīnu izruodi, itūreiz izgaismojūt taidys problemys kai tukša eksistence i tykumiskuo degradaceja.
“Peiļu medeibys” ir vīna nu ryugtuokūs Aleksandra Vampilova lugu. Tuos golvonais varūņs Viktors Zilovs ir cylvāks, kura dzeive uoreji ir sakuortuota, tok sevī jis izjiut tukšumu. Nasaverūt iz acim radzamū naapmīrynuoteibu ar ap sevi izbyuvātū dzeivi, jis turpynoj plyust pa straumi, aizpyldūt īškejū tukšumu ar alkoholu, uorlauleibys sakarim i sapynu par veiksmeigom peiļu medeibom.
Rodūšuo komanda skaita, ka, koč i nu lugys pīraksteišonys ir paguojs vaira par 50 godu i sabīdreiba ir izguojuse cauri sistemu, vierteibu i orienteru maiņai, itys dorbs vys vēļ izskaņ osai. Myusu dīnu cylvāks ir breivs sovā izalaseišonā, tok breiveiba nagarantej īškeju bolstu, i daudzi šudiņdīnys treisdesmitgadnīki, taipat kai golvonais varūņs, bīži izjiut apjukumu, trauksmi i orienteru zudumu.
“Stuosts nav par padūmu laiku. Leidzeigai kai Čehova dorbim, Vampilova tekstim pīmeit dziļa cylvāku psihologejis izpiete i analize, partū itam dorbam nav izteikta laikmata pazeimu i tys palīk aktuals ari 21. godu symtā,” atzeimoj režisors Olegs Šapošnikovs.
Izruodis scenografe i kostimu muokslineica ir Inga Bermaka, gaismu muokslinīks – Sergejs Vasiļjevs. Lūmuos: Miroslavs Blakunovs, Kristīna Zaharova, Kristina Tiško, Natālija Kotona, Jevgenijs Mihailovs, Aleksandrs Komarovs, Vanda Gibovska, Viktors Jancevičs, Eduards Beļnikovs.
Izruode byus krīvu volūdā ar tulkuojumu latvīšu volūdā titrūs. Ilgums: 3 stuņdis (divejūs cielīņūs). Īsokama skateituojim nu 16 godu vacuma.
Pyrmizruode – 3. oktobrī 18 stuņdēs, nuokušuo izruode – 4. oktobrī 17 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
