Itūsezon teatra repertuaru papyldynuos vairuoki dzili psihologiski jaunīstudiejumi, kurūs byus atspīgeļuoti seve mekliejumi i sarežgeitys attīceibys saimē. Reizē teatris turpynuos paplašynuot repertuarā puorstuovātūs volūdu daudzveideibu i cyta gods suokuos īstudēs izruodi, kurā skanēs pūļu volūda. Ari itamā sezonā teatris atteisteis storptautyskū sadarbeibu, turpynojūt īprīškejūs godūs veiksmeigai aizsuoktū vierzīni.
Durovys skateituojim Daugovpiļs teatris attaiseis 5. septembrī, atkluojūt sezonu ar paguojušuos sezonys nūslādzūšū pyrmizruodi – dāņu režisora Kima Bjarkis komedeju “Cīši svareiga persona (VIP)”.
Sovutīs pyrmuo jaunuos sezonys pyrmizruode gaidoma 3. oktobrī. Tys byus Aleksandra Vampilova lugys “Peiļu medeibys” īstudiejums, kurs taps režisoru Edgara Māliņa i Olega Šapošnikova kūpradē. Obeji režisori jau ir struoduojuši kūpā pi cytys Vampilova lugys – “Vacuokais dāls”. Pīredze da šam, kai ari īprīškejuo dorba panuokumi skubynuojuši īstudēt kūpā vēļ vīnu izruodi. Eksistencialajā dramā “Peiļu medeibys” tiks pieteitys sarežgeitys attīceibys sovā vydā, kai ari dzeivis atlikšonys i nanūteikteibys sajiutys temys. Izruode byus krīvu volūdā ar tulkuojumu latvīšu volūdā titrūs.
Paraleli dorbu pi Henrika Ibsena lugys “Rāgi” (zynoma ari kai “Spūki”) suocs režisors nu Norvegejis Terje Skunsengs-Neudērs (Terje Skonseng Naudeer). Myusu dīnuos itei luga teik skaiteita par vīnu nu Ibsena dramaturgejis viersyuņu, koč i piec tuos publiciešonys 1881. godā tei radeja lelu sašutumu i ilgu laiku tū nivīns naīsadrūsynuoja īstudēt. Tei ir saimis drama par tymsim nūslāpumim aba paguotnis rāgim, nu kurūs nav īspiejams aizbēgt. Pyrmizruode plānuota novembra suokuos. Izruodē pīsadola: Irina Kešiševa, Vladislavs Vasiļjevs, Mihails Samodahovs, Viktors Jancevičs, Alina Kalina.
Tyvojūtīs Zīmyssvātkim, teātris saryupēs duovonu sovim jaunuokajim skateituojim i jūs vacuokim – teatra repertuaru papyldynuos Jāņa Lūsēna muzyklys bārnim “Īkstīte”. Tei byus kūša izruode, kurā skanēs kai latvīšu, tai latgalīšu volūda.
Kai jau tyka mynāts īprīšk, naizpaliks i kasgadejais Jaungoda koncerts, kurs itūreiz maineis nūtikšonys vītu: kab duovuotu vareibu tū nūsavērt leluokam skateituoju skaitam, koncerts nūtiks Daugovpiļs Kulturys pilī.
Taps ari mozuos formys īstudiejums Vadima Bogdanova režejā.
Itūsezon teatris grib styprynuot sadarbeibu ar Baļtejis vaļstu teatrim i jau ir aizsuocs puorrunys ar Viļnis Vacū teatri par vīsizruožu apmaiņu, kai ari tiks turpynuota sadarbeiba ar Tallinys Sidalinnys teatri. Oktobrī Daugovpiļs teatris laissīs iz Reigu ar izruodi “Kaija”, novembrī pīsadaleis festivalā Biržūs.
Vaira informacejis par jaunīstudiejumim sekuos. Biletus iz izruodem septembrī i oktobrī var nūpierkt Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
Foto: Ivars Utināns
