Daugovpiļs teatra tragedeja “Hekube”, kurū latgaliski īstudējuse režisore nu Fraņcejis Tatjana Stepančenko-Bogdana, pyrmizruodi pīdzeivuoja 15. novembrī i sajēme skateituoju i teatra kritiku atzineibu. “Hekube” tyka nomināta Latgalīšu kulturys goda bolvai “Boņuks”, titullūmys atveiduotuoja Jūlija Ļaha niule nomināta “Spēlmaņu nakts” bolvai kategorejā “Goda aktrise”. Izruode atlasis konkursā tyka izvierzeita daleibai Storptautyskā senejūs greku dramys festivalā.
Itys festivals, uzjamūt izruodis nu vysa pasauļa, nūdrūsynoj myusdīneigu platformu teatra režisorim i jūs rodūšajom komandom, kab tī pīduovuotu senejūs greku tekstu interpretacejis sovā volūdā, pīškirūt tom sovys kulturys sovpateigū nūkruosu. Daudzi festivala īstudiejumi pīduovoj novatorisku skotu iz klasiskajim dorbim, izceļūt senejūs greku dramaturgejis puorlaiceigū raksturu i reizē ļaunūt atkluot kotrys vaļsts naatkuortojamū kulturys identitati. Festivalā da šam ir prezentāti īstudiejumi nu vaira nakai 24 vaļstu. Itūgod festivalā pīsadaleis pīcys izruodis: “Trojītis” (Spāneja), “Līsistrate” (Grīkeja), “Septeni pret Tēbom” (Kipra), “Alkestida” (Grīkeja) i “Hekube” (Latveja).
Informaceja par festivalu: https://www.greekdramafest.com/
Daleiba festivalā byus Daugovpiļs teatra nūslādzūšuo nūtikšona itamā sezonā. Jaunu sezonu teatris atkluos augustā, kod suoksīs dorbs pi jaunuizruožu. Sovutīs durovys skateituojim Daugovpiļs teatris attaiseis 5. septembrī, atkluojūt sezonu ar komedeju “Cīši svareiga persona (VIP)”.
Jaunajā sezonā Daugovpiļs teatrī tiks īstudāta Aleksandra Vampilova “Peiļu medeibys”, izruode taps režisoru Edgara Māliņa i Olega Šapošnikova kūpradē. Teatra repertuaru papyldynuos Henrika Ibsena “Spūki”, kurūs īstudēs režisors nu Norvegejis Terje Skunsengs-Neudērs (Terje Skonseng Naudeer). Taps ari mozuos formys īstudiejums Vadima Bogdanova režejā. Sovutīs tyvuok Zīmyssvātkim iz Daugovpiļs teatra skotivis plānuota pyrmizruode Jāņa Lūsēna muzyklam bārnim “Eiksteite”, kurū īstudēs Olegs Šapošnikovs. Naizpaliks ari kasgadejais Jaungoda koncerts, kurs itūreiz maineis nūtikšonys vītu: kab duovuotu vareibu tū nūsavērt leluokam skateituoju skaitam, koncerts nūtiks Daugovpiļs Kulturys pilī.
Bileti iz izruodem septembrī i oktobrī jau ir puordūšonā. Biletus var nūpierkt Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
