Izruodis darbeiba nūteik nailgi piec Trojis krisšonys. Hekube karā ir pagaisynuojuse vysu – veiru, trūni, breiveibu i vairuokus bārnus. Kod redzīs, ka cīsšonu kauss jau pylns, jei pīdzeivoj napīdūdamu nūdeveibu, i izmysumā dzymst juos olkys piec taisneigys atmoksys. Nu apstuokļu keilneicys jei puortūp liktiņa nūteiciejā.
Izruodē Hekubis lūmu izpiļdeis aktrise Jūlija Ļaha, kura skaita, ka Eiripids ir pīrakstejs dorbu, kurs ir apbreinojamai aktuals myusu dīnuos i viestej na tik par kara pakriesli, kas snādzās puori cylvākim vēļ ilgi piec tuo beigu, tok ari par puorsteidzūšu īškejū spāku.
“Sasadurūt ar gryuteibom, cyts salyust i apbad sevi, vēļ dzeivam asūt, tok kaids pat leluokajā bezizejā atrūn sevī spākus. Hekubē ir miļzeiga griba dzeivuot, jei ir cylvāks, kurs, par speiti vysam, napasadūd. Juos tai saucamuo atrībeiba ir reiceibnasūša reakceja iz apleik voldūšū nataisneibu. Kam pastuov moralis lykumi, kurūs puorkuopūt, cylvāki puortūp par nazvārim. Sovutīs Hekube, īraugūt apleik asūšū vīnaldzeibu i bezdarbeibu pret itaidim puorkuopumim, pat byudama verdzinis statusā, ar sovu reiceibu paruoda, ka taisneibai ir juobyut,” puordūmuos par sovu tālu doluos aktrise.
“Hekube” byus režisoris Tatjanys Stepančenko-Bogdanys debejis dorbs Latvejā. Jei ir absolvējuse Moskovys A. Lunačarska Vaļsts teatra muokslys instituta (GITIS) M. Knēbelis kursu. Nailgi piec instituta absolviešonys jei puorsacēle iz Vuoceju, piečuok iz Fraņceju, kur pīsadalejuse vysaidūs teatra i kinys projektūs, īstudējuse izruodis i vuicejuse aktermeistareibu.
Izruodis rodūšajā komandā ir ari scenografs Marijus Jacovskis (Leitova), kurs itūgod tyka apbolvuots ar ordiņa “Par nūpalnim Leitovys lobā” Bruninīka krystu, kai ari kostimu muokslineica Inga Bermaka, gaismu muokslinīks Sergejs Vasiļjevs, dramatiziejuma autore Kristīne Veinšteina i muzykaluo konsultante Alisa May, kura struodoj ar vēļ vīnu nūzeimeigu ituos izruodis elementu - kori.
Lūmuos: Jūlija Ļaha, Eduards Beļnikovs, Marks Šelutko, Agnese Laicāne, Margers Eglinskis, Kristīne Veinšteina, Egils Viļumovs, Ritvars Gailums, Zanda Mankopa, Alisa May, Inese Ivulāne-Mežale, Kristaps Saulītēns, Kaspars Krauklis.
Pyrmizruode – 15. novembrī 18.00 stuņdēs, nuokušuo izruode – 16. novembrī 17.00 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
