“Teatra festivals Nr.5” nūtiks nu 31. maja da 4. juņa, pīduovojūt septenis izruodis, tymā skaitā vīsizruodis nu Igaunejis i Itālejis. Taipat kai īprīškejūs godūs festivala programā īkļautys sarunys ar skateituojim i profesionaļu diskusejis par nūzarē aktualom temom. Tok itūgod festivalā ir i puora jaunīvadumu – skateituojus sagaida gruomotys i lugu skaitejumi, taipat programa papyldynuota ar praktiskim seminarim skotivis muokslu profesionalim.
31. majā festivalu atkluos Daugovpiļs teatra izruode tuo jaunuokajim skateituojim “Plykspuorneiša puorsacenis”, kura da šam vasta izbraukumūs iz školom Latgolā. Itūreiz na klasis telpā, tok teatra muokslinīku darbneicā bārni kūpā ar izruodis varūnim Voguleņu i Plykspuorneiti varēs īpazeit latgalīšu puosoku pasauli i īsavuiceit vairuokus latgalīšu vuordus i frazis. Izruodi īsoka skateituojim nu 6 da 9 godu vacuma.
Sovutīs vokorā iz Daugovpiļs teatra leluos zālis skotivis kuops tragironiska laikmeteiguos dejis izruode “Breivpruoteiguo verdzeiba”, kurū skateituojim pīduovuos laikmeteiguos dejis kompaneja SIXTH i Gertrudis īlys teatris. Tamā treis doncuotuojis Vladimira Goršantova horeografejā reflektej par altruisma nūzeimi vysu dzeivūs radeibu pasaulī.
1. junī Noto teatris “Tina Di Lorenzo” nu Itālejis izruodeis Oracio Kondorelli (Orazio Kondorelli) īstudiejumu sicilīšu volūdā “Alla Furca”, kurā atainuota kaida ītekmeiga cylvāka grāksyudze par varys kārdynuojumu i tuos susātiva pusi. Skateituojim tiks nūdrūsynuots tulkuojums latvīšu volūdā titrūs.
2. juņa 18 stuņdēs varēs pīsadaleit Dirty Deal Teatro izruodē ceremonejā “Vacūs kults” – atmosferiskā i žanryski naīrostā rituala i performativys sarunys apvīnuojumā par nūvacuošonu, laiku i pījimšonu. Sovutīs 19.30 stuņdēs iz sasatikšonu aicynoj akters Gundars Ābuoliņš, kurs Daugovpiļs teatra kopejneicā skaiteis Joahima Meierhofa romana “Ak, itei plaisa, valna plaisa” fragmentus.
Itūgod teatra festivala programā varēs nūsavērt ari Latvejis Nacionaluo teatra izruodi, tei byus režisora Roberta Daubura i dramaturga Jāņa Joneva kriminaldrama “Kū var cylvāks”, kas baļsteita dokumentaluos nūtikšonuos. Izruode nūtiks 3. junī 18 stuņdēs.
Tuos pošys dīnys vokorā 19 stuņdēs Vīneibys noma kopejneicā varēs nūsaklauseit dramaturgejis skaitejumus par seksualitatis temu. Skaitejumu cyklys “Sekss i Latveja” aicynoj iz svareigu, tok na vysod ārtu sarunu, itymā gadīnī apsaverūt seksualitati i kai plašuoku, i personeigu fenomenu. Piec kotra skaitejuma nūtiks saruna ar skateituojim.
Festivala pādejā dīnā varēs nūsavērt Latvejis Leļu teatra izruodi “Sibirejis haiku”, kas par deportaceju temu unikalā papeira animacejis tehnikā iz sarunu aicynuos saimis ar bārnim nu 10 godu vacuma i pīaugušūs. Itys īstudiejums sajiems vairuokys “Spēlmaņu nakts 2023/2024” bolvys: Goda izruode bārnim i/voi pusaudžim, Uorzemu žurejis bolvu, LMT Teatra Inovacejis bolvu. Izruode nūtiks Lelajā zālē 18 stuņdēs.
Tallinys Sidalinnys teatra izruode “Es pamešu Ukrainu 2022. godā” tiks par festivala nūslādzūšū izruodi. Igauņu dokumentaluo teatra klasikis Merlis Karuso īstudiejumā pīsadola akteri, kas atbraukuši iz Sidalinnys teatri piec Krīvejis ībrukuma Ukrainā. Tei ir atkluota izruode par jūs bierneibys atmiņom, pīradzātū karā, jaunu suoku mekliejumim i skotu iz prīšku. Izruode nūtiks Eksperimentalajā zālē 20 stuņdēs.
Piec kotrys izruodis skateituoji ir aicynuoti pīsadaleit sarunā ar izruodis veiduotuojim i dalinīkim, kab daleitūs īspaidūs par radzātū i aizdūtu piec izruodis nūsavieršonys rodušūs vaicuojumus.
Festivala laikā nūtiks ari diveji praktiskī seminari skotivis muokslu profesionalim – “Greenstage SAPA reiks organizacejis ilgtspiejis nūviertiešonai” (vadeis Rihards Gāle) i “Iztielis krize i tuos puorvariešona” (vadeis Matīss Kaža) –, kai ari diskuseja “Krize teatrī i pasaulī”, kurū vadeis Henrieta Verhoustinska.
Itys festivals ir vairuoku teatru sadarbeibys auglis, i tuo mierkis ir pīduovuot myusdīneigu teatra muokslu i daudzveideibu vītā, kur tei kasdīnā nav plaši puorstuovāta. Tī ir i kūpā saīšonys svātki teatra radeituojim i skateituojim. Ari itūgod namaineigs palīk festivala sauklis “Latgola ir tyvai”. Tys atguodynoj i festivala gostim, i regiona dzeivuotuojim, ka Latgola nav kaida nasasnādzama vīta Latvejis voi Eiropys kontekstā. I festivals tū aplīcynoj praksē, kotru godu puļcejūt vys vaira teatru i paplašynojūt dalinīku geografeju.
Ar festivala programu var īpasazeit Daugovpiļs teatra sātyslopā:
Festivalu reikoj Daugovpiļs teatris, Dirty Deal Teatro, Gertrudis īlys teatris sadarbeibā ar Latvejis Leļu teatri.
Bileti: Daugovpiļs teatra kasē (654 26520), „Biļešu paradīze” kasēs i škārsteiklā www. bilesuparadize.lv.
“Teatra festivals Nr.5” nūteik ar Vaļsts kulturkapitala fonda i Daugovpiļs vaļstspiļsātys pošvaļdeibys atbolstu.
