Vosorys suokuos Daugovpilī gaidomi svātki teatra muokslys meiļuotuojim - nu 3. da 6. juņa nūtiks “Teatra festivals Nr.4”, kura programu veidoj Latvejis i uorvaļstu teatru izruodis, kas izaceļ i ar naīrostu formu, i šudiņdīnys cylvākam aktualu i vajadzeigu saturu, kai ari sarunys ar skateituojim i profesionaļu diskusejis par nūzarē aktualom temom. Festivalu reikoj Daugovpiļs teatris, Dirty Deal Teatro i Gertrudis īlys teatris sadarbeibā ar Latvejis Leļu teatri.
Maija Pavlova, Gertrudis īlys teatra producente, kai ari vīna nu festivala idejis autorim i organizatorim, stuosta: “Itys festivals pīduovoj myusdīneigu teatra muokslu i daudzveideibu vītā, kur tei kasdīnā nav plotai puorstuovāta. Tei ir ari kūpā saīšona teatra profesionalim, kab sezonys nūslāgumā apsprīstu tū, kas ir aktuals nūzarē i mums - teatra radeituojim, i myusu skateituojim. Pārņ izveiduotuo saikne ar skateituojim i jūs naviltuotuo interese i aktivuo leidzdaleiba sarunuos piec izruodem ir tys golvonais īmeslis, parkū gribiejom atkuortuotai organizēt itū festivalu Latgolā i paplašynuot tuo programu.
Itūgod festivals dabuos storptautysku akcentu – tymā pīsadaleis Igaunejis teatris “Eesti Noorsooteater”, kas, īspiejams, puorsteigs ar naparostū izruodis nūtikšonys vītu, i trymdys boltkrīvu naatkareiguo teatra apvīneiba “Volnya Kupalautsy” ar izruodi, kura aktualizej vaicuojumus, kas ir dīnys parādā ari myusu ziņuos – saisteitus i ar karu, i ar politiskū situaceju sābrūs. Pa munam, ir cīši svareigi festivala ītvorūs na tik boguotynuot kulturys pīduovuojumu regionā, tok ari styprynuot myusu piļsūniskū apziņu i stuosteit par tū, kas nūteik pi myusu i tepat sābrūs.”
Festivals tiks atkluots 3. junī ar izruodi “Zekamerons”, kas taiseita piec Boltkrīvejis politīslūdzeituo Maksima Znaka gruomotys motivu. Izruodē atspīgeļuota politīslūdzeitūs kasdīna - nūvāruojumi, kuriozi i jūki, aizkustynūšys situacejis i skaudruo realitate -, kurū papyldynoj dzeja i muzyka. Izruodi pīduovoj naatkareiga teatra apvīneiba “Volnya Kupalautsy”, kurū veidoj bejušī Jankys Kupalys Nacionaluo teatra trupys dalinīki, kas piec 2020. gods nūtikšonu Boltkrīvejā beja spīsti emigrēt iz Pūleju.
Nuokušajā dīnā Latvejis Leļu teatris pīduovuos festivala apmaklātuojim dokumentalu taustivi “Gaisma, es tevi dzieržu”, kas viestej par naredzeigu cylvāku kasdīnu i paradzāta skateituojim nu 14 godu vacuma. Sovpus Daugovpiļs teatris nūspielēs filozofisku trilleri latgaliski “Kaids nūteikti atīs”, kurs itūgod sajēme Latgalīšu kulturys goda bolvu “Boņuks”.
5. junī varēs nūsavērt Igaunejis teatra “Eesti Noorsooteater” objektu teatra izruodi bārnim i jaunīšim “Myusa, prusaks i ziernyuklis”, kas nūtiks mobilajā teatrī “Karavana” – ceļuojumu pīkabē, kas puortopuse par mini teatri. Sovpus Gertrudis īlys teatris izruodeis “Spālmaņu nakts 2023/2024” bolvai nominātū muzykys teatra izruodi “Monstera Deliciosa”, kurā četrys vysaidu paaudžu sīvītis, izdzīžūt cytu sīvīšu stuostus, izstuosta ari sovejūs.
6. junī festivalu nūslēgs Dirty Deal Teatro izruode “Tei ir myusu kauna vaine” - vīna dīna iz zemis muzykys, dzejis, dejis i volūdys kolažā. Tys ir jaunuos režisoris Elīzys Dombrovskys i juos vīnaudžu skots iz pasauli šudiņ, kas izskaņ kai aicynuojums piec maiguma i mīlesteibys nadrūseibys i švuorbu pylnajā pasaulī.
Piec kotrys izruodis skateituoji ir aicynuoti pīsadaleit sarunā ar izruodis veiduotuojim i dalinīkim, kab daleitūs īspaidūs par radzātū i aizdūtu piec izruodis nūsavieršonys rodušūs vaicuojumus.
Sovpus skotivis muokslys profesionalim festivalā paradzātys treis diskusejis. Sarunā “Muokslinīki “rameišūs” – trauslaos rūbežs klasifikacejis i puormeju vydā” tiks maklātys atbiļdis iz tū, kai saglobuot atvārtu skotu iz puormejom i atteisteibu, napagaisynojūt vareibu saprūtamai skaidruot daudzveideigū muokslys procesu skateituojim. Itamā diskusejā pīsadaleis Zane Radzobe, Henrieta Verhoustinska, Mārtiņš Eihe, Roberts Dauburs. Diskuseju vadeis Linda Krūmiņa.
Ūtruo diskuseja “Stuņdis attuoluma teatris kotram Latvejis dzeivuotuojam” škatynuos vaicuojumus par kulturys daīmameibu regionūs. Sarunā pīsadaleis Andris Slišāns, Elīna Celmiņa, Evita Ašeradena, Inga Goldberga i Anda Laķe. Diskuseju vadeis - Edgars Raginskis.
Teatra profesionaļu diskusejis nūslēgs saruna “Dokumentalais teatris i realitate – kūpeigais i atškireigais”, kurā tiks apsprīstys vareibys i īrūbežuojumi, kaidus snādz dokumentaluo teatra pīeja. Diskusejis dalinīki: Roberts Dauburs, Anna Belkovska, Agnese Puisāne; diskuseju vadeis Lolita Grāvīte.
Ar festivala programu var īpasazeit Daugovpiļs teatra sātyslopā:
Bileti: Daugovpiļs teatra kasē (654 26520), „Biļešu paradīze” kasēs i škārsteiklā www. bilesuparadize.lv.
“Teatra festivals Nr.4” nūteik ar Vaļsts kulturkapitala fonda, Zīmeļvaļstu Ministru padūmis biroja Latvejā, Daugovpiļs vaļstspiļsātys pošvaļdeibys īstuodis “Vīneibys noms” i mierkprogramys “Latvīšu viesturyskūs zemu atteisteibys programa” atbolstu.
