Tys ir myusdīneigs kabare šovs, kurā teik svieteita skotivis muokslys daudzveideiba. “Cabaret Dinaburg 2.0” mejās dzeivuo muzyka i izjustys muokslinīku performancis, komedeja, cyrka muoksla i jutekliskys dejis, i tū vysu harmoniskai saspriež konferansje dzierkstūšī jūki, kuri nareši dasadur ari pikantom temom.
Programā ir īkļautys taidys pasaulī zynomys dzīsmis kai Kristīnys Agilerys “Candyman”, Tedija Svima “Lose Control”, Larys Fabianys “Adagio” i daudzys cytys, sovutīs pyrma šova i storpbreiža laikā kabare atmosferu boguotynuos džeza kompozicejis dzeivā izpiļdejumā.
Muzykys, dejis i ekstravagancis pasaulī skateituojus pavadeis četri konferansje – akteri Aleksandrs Komarovs, Zanda Mankopa, Jelena Netjosina i Ritvars Gailums. Sovutīs pasauļslovonys dzīsmis izpiļdeis vītejī muokslinīki, tymā skaitā Daugovpiļs teatra akteri.
Taipat kai īprīškejā kabare šovā, ari itūreiz teatra leluos zālis parterā sādvītys byus izvītuotys pi goldu, i partera bileta cenā byus īkļauts kompliments nu teatra, kurū varēs baudeit pasuokuma laikā. Stuņdi pyrma pasuokuma i storpbreiža laikā nūtiks apkolpuošona pi goldu, dorbuosīs ari teatra kopejneica.
„Cabaret Dinaburg 2.0” režisors ir Olegs Šapošnikovs, scenareja autors – Aleksandrs Komarovs, horeografe – Irina Bogeruka, scenografe i kostimu muokslineica – Inga Bermaka, gaismu muokslinīks – Sergejs Vasiļjevs.
Pasuokums nūtiks latvīšu i krīvu volūdā, paradzāts skateituojim nu 16 godu vacuma. Pasuokuma ilgums: 2 stuņdis 30 minutys (ar storpbreidi).
„Cabaret Dinaburg 2.0” pyrmizruode nūtiks 26. septembrī 20.00 stuņdēs. Jaunradeitū kabare programu varēs baudeit ari 27. i 28. septembrī, kai ari 21. i 22. novembrī.
Bileti – Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.
