16.11.

Režisors Vadims Bogdanovs īstudej komedeju par veirīšu draudzeibu

Daugovpiļs teatrī tūp fraņču dramaturgis Jasmīnys Rezā lugys “Art” (“Muoksla”) īstudiejums Vadima Bogdanova režejā. Komedejā par veirīšu draudzeibu, kura teik iz izieršonys rūbeža, pīsadola akteri Margers Eglinskis, Ritvars Gailums, Egils Viļumovs. Pyrmizruode nūtiks 1. decembrī.

Nazkod dzeivuoja treis draugi, i dzeivuoja jī saticeibā pīcpadsmit godu, cikom vīns nu jūs nanūpierka boltu gleznu ar boltom streipem par 30 000 eiro. Seržs skaita, ka tei ir muoksla, Marks – ka tys ir māslys, sovutīs Ivans itymā streidā lobpruot vyspuor napīsadaleitu. Tok izaruoda, ka aiz streida par boltū gleznu globojās daudzi vaira nakai tikai atškireiga gaume.

‍

Jasmīnu Rezā ituos lugys pīraksteišonai īdvasmuoja juos pošys reakceja iz drauga nūpierktū muokslys dorbu. Par laimi, juos smīkli naaizvaiņuoja drauga, tok itei amizantuo situaceja lyka aizadūmuot, kai byutu, ka nūtyktu cytaiži. Autore par sovim dorbim ir sacejuse: “Munys lugys vysod teik raksturuotys kai komedejis, tok es skaitu, ka tuos ir tragedejis – smīkleigys tragedejis.” Ari lugu “Art” jei raksturoj kai sirdi plūsūšu stuostu par plaisu cylvāku vydā.

‍

Nu lugys pyrmizruodis 1994. godā, tei ir īstudāta vaira nakai 30 volūduos i ir sajāmuse Lorensa Olivjē bolvu kai lobuokuo komedeja (1997) i Tonija bolvu kai lobuokuo luga (1998). Itei luga zynoma ari skateituojim Latvejā – tei jau tykuse īstudāta Jaunajā Reigys teatrī (1999), Dailis teatrī (2017) i Latvejis Nacionalajā teatrī (2018). Daugovpiļs teatrī veirīšu draudzeibys peripetejis škatynuos režisors Vadims Bogdanovs.

“Tei ir cīši smīkleiga luga par tū, cik baiseigai i suopeigai ir pagaisynuot tyvu cylvāku. Ituos lugys varūni jau seņ draudzejās i labi vīns ūtra zyna. Kaidā šaļtī jim ituos zynuošonys paleidz truopeigai īsist pa draugu suopeiguokajom vītom. I jūs streidi, verūtīs nu molys, redzīs smīkleigi, kam mes jimūs atpazeistam poši sevi. Tymā ari globojās ituos lugys vierteiba – mes varim tamā saredzēt poši sovu nažieleibu, aizvaiņuojumu i gribiešonu byut vajadzeigam,” stuosta režisors.

Izruode “Art” ir par skaistu, sarežgeitu i samazgluotu draudzeibu, kurā natryukst kai kuopumu, tai krytumu, bet kura, par speiti vysam, atsasoka iziert.

Izruode nūtiks latvīšu volūdā. Nūtikšonys vīta: Eksperimentaluo skotive. Ilgums: 1 stuņde 40 minutys.  

Pyrmizruode – 1. decembrī 18.30 stuņdēs.

Nuokušuos izruodis – 5. decembrī 18.00 stuņdēs, 13. decembrī 17.00 stuņdēs, 17. janvarī 15.00 stuņdēs, 22. janvarī 18.30 stuņdēs.

Bileti: Daugovpiļs teatra kasē (654 26520), „Biļešu paradīzes” kasēs vysā Latvejā i škārsteiklā www.bilesuparadize.lv.

‍

No items found.