Dramaturga Aleksandra Vampilova luga “Peiļu medeibys” pīsavierš cylvāka īškejai vīntuleibai, viļšonuos sajiutai i dzeivis jāgys mekliejumim. Lugys centrā ir Zilovs – treisdesmitgadeigs veirīts, kuram, kai redzīs, nikuo natryukst: jam ir dorbs, jauns dzeivūklis, draugi i meila sīva. Tok aiz uorejuos labkluojeibys globojās cylvāks, kurs najiut pīpiļdejuma nivīnā nu dzeivis jūmu. Zilova dzeive aizrit tukšgaitā, strauji tyvojūtīs kraujis molai.
“Peiļu medeibys Zilovam palīk par naaizsnādzama mīra simbolu,” stuosta golvonuos lūmys atveiduotuojs Miroslavs Blakunovs, kurs atzeimoj, ka Zilovs ir cylvāks iz sabrukuma rūbeža. “Jis ir pīaudzs cylvāks, kuram ir vareiba izalaseit, kaidu ceļu īt, tok jis, koč i na vysod apzynuotai, otkon i otkon izalosa spert napareizū sūli. Problemys pamozam puorjam juo dzeivi, i apleicejī apstuokli vys skaidruok signalizej, ka itai turpynuotīs vaira navar. Tok jis beistās īsavērt sevī, naspiej pīzeit sovu vaini i uzajimt atbiļdeibu par pīlaistajom klaidom,” stuosta akters.
.jpg)
Režisors Olegs Šapošnikovs: “Itamā lugā ir uzskotamai paruodeita cylvāka pakuopeniska izdzisšona, dvēselis nuove. Tys itūšaļt ir cīši aktualai. Byutu idealai, ka kotrys skateituojs varātu atpazeit sevī koč kū nu golvonuo varūņa Zilova, kam kotrā nu myusu ir koč kas nadzeivs.”
“Mes tik bīži dzeivojam nuokūtnis gaiduos, it kai tei eistuo dzeive suoksīs koč kod piečuok. Mes gaidom itū šaļti godim, namonūt, ka gaideišona pamozam puorsavierš par myusu vīneigū dzeivi. Tok dzeive na vysod dūd ūtru vareibu,” puordūmuos par izruodis viestejumu doluos režisors Edgars Māliņš.
Īstudiejuma “Peiļu medeibys” pyrmizruode tyka uzjimta ar stuovaplausim. Piec pyrmizruodis vīns nu skateituoju Vladimirs Gorevs pasadaleja sovūs īspaidūs: “Tei ir uorkuorteigai smoga dramaturgeja, i tys nikaidā ziņā nav izklaidejūšs saturs. Pyrma vaira nakai pusis godu symta saraksteituo luga puorsteidzūšā kuortā nav palykuse par vāluo padūmu laika muzeja eksponatu. Kam laiki puorsamej daudzi mudruok nakai cylvāks. Mes vys vēļ muokam iznycynuot tū, kū meiļojam. Vys vēļ globojam bailis aiz ironejis. Vys vēļ spiejam kaidu dīnu atkluot, ka uorejai vysā sakuortuota dzeive nazparkū vaira nasaredzīs asam dzeive. I taišni ite teatris puorstuoj byut izklaide. Tys palīk par sarunu ar skateituoju, nu kurys šaļtim gribīs nūsavērst. Tok šaļtim daudzi vierteiguok ir izīt nu teatra īškeji satrycynuotam. Kod izruode vēļ kaidu laiku turpynojās ari piec tuo, kod akteru iz skotivis vaira nav. Tei turpynojās tevī.”
Izruode “Peiļu medeibys” nūteik krīvu volūdā ar tulkuojumu latvīšu volūdā titrūs. Ilgums: 3 stuņdis (divejūs cielīņūs). Īsokoma skateituojim nu 16 godu vacuma.
Izruodis scenografe i kostimu muokslineica ir Inga Bermaka, gaismu muokslinīks – Sergejs Vasiļjevs. Lūmuos: Miroslavs Blakunovs, Kristīna Zaharova, Kristina Tiško, Natālija Kotona, Jevgenijs Mihailovs, Aleksandrs Komarovs, Vanda Gibovska, Viktors Jancevičs, Eduards Beļnikovs, Vladislavs Vasiļjevs, Artjoms Sigajevs.
Nuokušuo izruode – 20. novembrī 18.30 stuņdēs.
Bileti: Daugovpiļs teatra kasē (654 26520), „Biļešu paradīzes” kasēs vysā Latvejā i škārsteiklā www.bilesuparadize.lv.
Īstudiejums radeits ar Daugovpiļs vaļstspiļsātys pošvaļdeibys atbolstu.
