“Īstudiejums leidzynojās sapyna laboratorejis daudzdimensionalam seansam ar skaistu, bīdynojūšu i drupeit monotonu jutūni, kur īškejūs puordzeivuojumu spāku natradicionalai attāloj uorejais pasauļs,” Kroders.lv publicātajā recenzejā rakstejuse teatra kritike Ilze Kļaviņa.
Kaids puors īsarūn naseņ dabuotā, dobys paplūseitā sātā, kura atsarūn nazkur nakurīnis vydā. Beidzūt jī ir kūpā, diveji viņ, tuoli paceli nu vysu. Tok pruotu suoc tārpynuot namīreiga dūma, ka kaids varātu atīt, i dūmuotuos mīra ūstys iudiņus sašyupoj baile. Kaids eistyn atīs. I izviļks vierspusē tū, kas da ituo bejs nūglobuots. Nauzticeibu, nadrūseibu i greizsirdeibu.
Lugys “Kaids nūteikti atīs” autors ir Juns Fose - norvegu rakstnīks, dramaturgs i tulkuotuojs, Nobela premejis literaturā laureats. Zeimeigai, ka Fose sovus dorbus roksta jaunnorvegu volūdā kurū, leidzeigai kai latgalīšu volūdu, kasdīnā lītoj nalela sabīdreibys daļa. Fosis rūkrokstu raksturoj vuordu i fražu atsakuortuošona, pauzis i teksta muzikalitate, i režisors Olegs Šapošnikovs atzeimoj, ka beja apbūrts ar lugys teksta mageju, kas, pa jam, aizvad eipašā sajiutu pasaulī, sovutīs tuos saturs ir dzili filozofiskys i dažaidim simbolim puorpiļdeits. Izruode naviestej tik par veirīša i sīvītis attīceibom sovā vydā, tei lykuse komandai aizadūmuot ari par cylvāka saskarsmi ar apleicejū pasauli, par baili nu nazynomuo i naizbāgamom puormejom.
Izruodis rodūšū komandu veidoj režisors Olegs Šapošnikovs, scenografe i kostimu muokslineica Inga Bermaka, kusteibu konsultante Irina Bogeruka, video animaceju autore Anna Meldrāja, gaismu muokslinīks Sergejs Vasiļjevs. Īstudiejumā skaņ Jēkaba Nīmaņa i Marka Šelutko originalmuzyka. Lugu latgaliski tulkuojuse Jūlija Tumanovska. Īstudiejums radeits ar Norvegejis viestnīceibys Latvejā, Zīmeļvaļstu Ministru padūmis biroja i Volūdu sātys paleigu.
Bileti iz “Kaids nūteikti atīs” vīsizruodi Latvejis Nacionalajā teatrī jau ir puordūšonā „Biļešu paradīze” kasēs vysā Latvejā i www.bilesuparadize.lv.
