Lugys autors ir dāņu dramaturgs Ludvigs Holbergs, kurs Latvejā vaira zynoms ar sovu jūku lugu “Kolnu Jepe” ci “Žyupu Bārtuļs”. Daugovpiļs teatra izruodis pamatā ir ituo skandinavu autora luga “Den stundesløse”, kurys golvonais varūņs Vilgešrejs ir vysod aizjimts muižinīks, kurs bīži viņ īgrymst seikumūs i sovys nūzeimeibys apziņā.
Tai kai jis ir cylvāks ar varu, juo rakstura īzeimu i īgrybu deļ cīš vysi apleicejī – padūtī i pat poša meita, kurai jis naļaun apprecēt meiļuotū cylvāku. Par laimi, juo kolpyune Pernille sapyn sarežgeitu intrigu teiklu, kab beiguos vystik triumfātu mīlesteiba. Režisors Kims Bjarke pastreipoj, ka egoismam i narcismam ir sova cena, kurū, nasaverūt iz izruodis laimeigajom beigom, Vilgešrejam daīt samoksuot.
Izruodē golvonū lūmu attāloj akters Vadims Bogdanovs, kuram tei beja sova veida izaicynuojums: “Delartiskuo komedeja ir žanrys, kurā es nikod eisti naasu struoduojs, tok itamā izruodē mes itam žanram asam pīsatyvuojuši vysā tyvai. Taids spēlis veids kai atbreivoj, tai līk struoduot daudzi gūdeiguok. Kab ekscentrika, kaidā mums juoeksistej iz skotivis, byutu organiska i nūstruoduotu, ir juobyut maksimali patīsam iz skotivis, kas nav vīgli. Juopīzeimoj, ka maņ beja tyva režisora humora izjiuta. Dīvynoju, kod humors ir na tik tekstā, tok i reakcejā, klusumā i pauzēs. Runojūt par munu lūmu, taidu cylvāku kai Vilgešrejs myusu dīnuos ir cīši daudzi. Myusu dzeivis temps pasadreizynoj, dorbu apjūms, kas aizpylda myusu dzeivi, pīaug. Muns varūņs nivīna aizdavuma napalaiž garum, tok tymā pošā laikā nikuo ari nadora. Koč kaidā ziņā itei izruode ir par prioritatem i izviertiešonu, kas dzeivē ir eistyn svareigs i myusu laika vārts.”
Izruodis rodūšū komandu veidoj režisors Kims Bjarke, scenografe i kostimu muokslineica Inga Bermaka, muzykys autors Aleksejs Fedotovs i gaismu muokslinīks Sergejs Vasiļjevs. Izruodē pīsadola: Vadims Bogdanovs, Jelena Netjosina, Kristina Tiško, Eduards Beļnikovs, Miroslavs Blakunovs, Irina Kešiševa, Vladislavs Vasiļjevs, Mihails Samodahovs, Viktors Jancevičs, Nikolajs Gedzjuns, Aleksandrs Komarovs, Ritvars Gailums, Milena Savkina, Inese Ivulāne-Mežale, Zanda Mankopa, Kristīne Veinšteina.
Izruode ir krīvu volūdā, skateituojim teik nūdrūsynuots tulkuojums latvīšu volūdā titrūs. Īstudiejums radeits ar Daugovpiļs vaļstspiļsātys pošvaļdeibys i Zīmeļvaļstu Ministru padūmis biroja Latvejā atbolstu.
“Cīši svareiga persona (VIP)” ir ituos sezonys pādejuo pyrmizruode Daugovpiļs teatrī, tok na nūslādzūšuo nūtikšona. Dreiži gaidomys teatra vīsizruodis Reigā: 25., 26., 27. majā Čehova teatra arkadē varēs nūsavērt izruodi “Vacuokais dāls”, sovutīs 11. junī Latvejis Nacionalajā teatrī – muzyklu “Agruo ryusa”. Kai ari jau trešū godu piec kuortys vosorys suokuos Daugovpilī puļcēsīs vairuoki profesionalī teatri i ar daudzveideigu i boguoteigu Teatra festivala Nr.5 programu īvadeis piļsātys svātku nūtikšonys. Sezonu teatris itūgod nūslēgs naīrostai vālu, kam julī brauks iz storptautysku senejūs greku dramys festivalu Kiprā ar izruodi “Hekube”.
