“Luga, kas līk smītīs, tok reizē aizkustynoj sirdi, pa munam, ir vīns nu skaistuokūs teatra muokslys sasnāgumu,” stuosta lugys autors Pīters Kvilters, kuram pateik, kod tragedeja i komedeja sasavyn kūpā. Taipat ari itamā lugā jis caur humoru aktualizēja suopeigu temu – vīntuleibu vacumdīnuos.
Jau ilgu laiku Harijs saiminīkoj saimis sātā vīns pats – juo meiļuotuo sīva ir nūguojuse myužeibā, bet bārni jau seņ pīauguši, i kotrys dzeivoj sovu dzeivi, gastejūt pi tāva vysā reši. Ituos šaļts lītu kuorteiba Hariju naapmīrynoj, i jis nūbrīst puormejom, kurys juoapsprīž na tik ar sīvys duovuotū Merilinys Monro plakatu, tok i ar bārnim. Kod Eimija i Skots, tāva paaicynuoti, laižās pavadeit nedeļgolu dzymtajā sātā, jī pat navar īsadūmuot, kaids puorsteigums jūs tī sagaida. Izruodis varūni sasateik ar krizis situaceju, kas palīk par jūs saimis saišu nasaraunameibys puorbaudejumu i līk bārnim beidzūt pavērst skotu nu sovu iz tāva vajadzeibu.
.jpg)
Pylnašu zylgajā gaismā pasaruoda ari kaids mistiskys tāls, kura patīsū byuteibu skateituoji atkluos, tik nūsaverūt izruodi. Ituo tāla atveiduotuoja Zanda Mankopa atkluoj nalelu nūslāpumu: “Es asu tei, kas aizpylda tukšumu Harija sirdī i paleidz jam dzeivis gryutuokajā šaļtī.”
“Tys ir stuosts par saimi, par vīntuleibu i mīlesteibu. Par tū, kai mes šaļtim egoistiski paskrīnam garum sovim meilajim i nanūviertejam tū, kas mums ir,” stuosta aktrise Kristīne Veinšteina, kura izruodē spielej Harija meitu Eimiju. ”Itys stuosts līku reizi atguodynoj, cik svareigai ir nasabeit dzeivuot dzeivi – izdauzeit punus, izbaudeit prīcys šaļts i vys vēļ īt iz prīšku, spiejūt lyugt paleiga, kod tys ir vajadzeigs.”
Izruodis rodūšū komandu veidoj režisors Herberts Laukšteins, scenografs Aigars Uozuoliņš, kostimu muokslinīks Gatis Timofejevs, horeografe Irina Bogeruka, gaismu muokslinīks Mārtiņš Feldmanis. Lūmuos: Margers Eglinskis, Kristīne Veinšteina, Egils Viļumovs, Jevgenijs Mihailovs i Zanda Mankopa.
Nuokušuos izruodis: 17. aprelī 18.30 stuņdēs i 8. majā 18.30 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
