Daugovpiļs teatra pavasara vīsizruodis Reigā jau ir palykušys par ilggadeju tradiceju. Itūreiz ar sovim skateituojim golvyspiļsātā Daugovpiļs teatris sasatiks M. Čehova Reigys Krīvu teatra jaunajuos telpuos – Arkadis zālē – i pīduovuos komedeju “Vacuokais dāls” – vīnu nu skateituoju pīpraseituokajim īstudiejumim, iz kurū ari treis godus piec tuo pyrmizruodis bileti Daugovpilī teik izpierkti puora minutu laikā.
Vīns nu izruodis popularitatis īmesļu ir breineigi akterdorbi, kurūs atzineigai nūviertiejuši ari kritiki – 2023. godā Miroslavs Blakunovs tyka nomināts “Spēlmaņu nakts” bolvai kategorejā “Goda akters”, sovutīs Mihails Samodahovs – “Goda akters ūtruo plāna lūmā”. Juopastreipoj, ka Čehova teatra Arkadis zālis ītiļpeiba ir leluoka nakai Daugovpiļs teatra Eksperimentalajai zālei, deļtuo skateituojim byus leluoka vareiba īspēt nūpierkt biletus iz izruodem Reigā nakai Daugovpilī, i teatris aicynoj izmontuot itū unikalū vareibu.
%20-%20kopija.jpg)
Izruodē “Vacuokais dāls” atainuotys divejis dīnys Sarafanovu saimis dzeivē, kura piec nagaideitu gostu īsarasšonys teik apgrīzta kuojom gaisā. Kab iz nakti tyktu pi patvāruma, Busigins i Silva izspielej nalelu viļteibu, i Busigins teik uzdūts par najauši izalaseita dzeivūkļa saiminīka uorlauleibys dālu, kurs atbraucs gostūs pi tāva. Jau pyrmajuos gasteišonys stuņdēs Busiginam daīt īsasaisteit sovys tikū dabuotuos saimis problemu škatynuošonā, i ar kotru šaļti jam palīk vys gryušuok škiertīs nu itūs cylvāku. Viļtvuords, kurs meklēja patvāruma iz vīnu nakti, puora dīnu laikā teik pi nazkuo daudzi vierteiguoka – saimis. Niu jam juoizsprīž – bēgt i aizmierst voi riskēt, atsazeit i cerēt iz pīdūšonu.
Lugys autors ir Aleksandrs Vampilovs, kurs sovūs dorbūs prats meistareigai attāluot cylvāka sarežgeitū, pretruneigū dobu, sapeit tragiskū ar komiskū, kasdīniškajā saredzēt byutyskū, deļkuo nareši teik saleidzynuots ar Čehovu i raksturuots kai vīns nu izcyluokūs 20. godu symta dramaturgu. Kai atzeimoj izruodis inscenātuojs Olegs Šapošnikovs, “Vacuokais dāls” ir augstvierteiga dramaturgeja, tamā nav ūtruo plāna lūmu, kotram nu varūņu ir daudzsluoņains i saistūšs stuosts.
“Daugovpiļs teatra izruodis spāks ir tymā, ka režisori i akteri nikuo narauga pīruodeit, jī nikuo natransformej i uzatyc lugai – tys konkretajā gadīnī ir izaruodejs pareizs sūļs. Izruodei pīmeit i konkreteiba, i atainuotajam laikmatam pīstuovūšs naivums,” izruodis recenzejā atzeimuojs teatra kritiks Atis Rozentāls.
Īstudiejuma “Vacuokais dāls” režisors ir Edgars Māliņš, inscenātuojs ir Olegs Šapošnikovs, scenografs - Egils Viļumovs, kostimu muokslinīks - Gatis Timofejevs, gaismu muokslinīks - Sergejs Vasiļjevs. Lūmuos: Mihails Samodahovs (Sarafanovs), Miroslavs Blakunovs (Busigins), Vladislavs Vasiļjevs (Silva), Kristina Tiško (Nina), Artjoms Afanasjevs (Vaseņka), Aleksandra Koguce (Makarska), Jevgenijs Mihailovs (Kudimovs).
Izruode ir krīvu volūdā, tei tiks spālāta Čehova teatra arkadē (Vaļņu īlā 19, ar īīšonu nu Gleznuotuoju īlys). Izruodis ilgums – 2 stuņdis 30 minutys (ar storpbreidi).
Juodasoka, ka tei byus vīsizruožu apmaiņa obeju teatru vydā, i majā gaidomys ari Čehova teatra vīsizruodis Daugovpilī.
Bileti: “Biļešu serviss” kasēs i škārsteiklā www.bilesuserviss.lv.
