Šudiņ, 6. februarī, tyka paziņuoti Latgalīšu kulturys goda bolvys “Boņuks 2025” nominanti. Tūs vydā ir diveji Daugovpiļs teatra īstudiejumi latgaliski “Hekube” i “Plykspuorneiša puorsacenis”, kai ari aktrise Kristīne Veinšteina, bez kuruos īguļdejuma itī īstudiejumi nabyutu radeiti.
Pārnejuo gods suokuos myužu suoce izbraukumu izruode “Plykspuorneiša puorsacenis”, kura ir pīmāruota izruodeišonai klasēs i paradzāta suokumškolys bārnim. Izruodē bārni vuicuos latgalīšu volūdu i īpasazeist ar teatra muokslys elementim. Vīna nu izruodis idejis autoru i tuos dramatiziejuma autore ir Daugovpiļs teatra aktrise Kristīne Veinšteina. Taipat Kristīne radeja senejūs greku tragedejis dramatiziejumu latgaliski, i itys apjūmeigais dorbs kolpuoja par pamatu izruodei “Hekube”, kurys pyrmizruode nūtyka 2025. gods 15. novembrī i kura tyka raksturuota kai nūzeimeigs sūļs iz prīšku latgaliskuo teatra atteisteibā.
Itūgod tyka īsnīgti 155 pretendentu dasacejumi, kurūs izviertēja žurejis komiseja. Tuos sastuovā dorbuojuos īprīškejūs godu bolvu sajiemieji, medeju puorstuovi, bolvys reikuotuoju puorstuovi, latgaliskuos kulturys sabīdryskī aktivisti i attīceigūs sferu daaicynuotī eksperti, kurūs kasdīna nav saisteita ar latgaliskū kulturu.
Desmit nūzeimeiguokuos 2025. gods nūtikšonys, aktivitatis i cylvāki latgaliskajā kulturā tiks gūdynuoti kasgadejā bolvys padūšonys ceremonejā 14. martā 18.00 stuņdēs, padūdūt ari bolvu par myuža īguļdejumu latgalīšu kulturys atteisteibā. Itūgod bolvys padūšonys ceremoneja nūtiks kai ar skateituoju byušonu kluotyn Latgolys viestnīceibā GORS, tai tū varēs vērtīs tīšraidē LSM.lv, REplay.lv i klauseitīs LR1, kai ari vērtīs LTV1 21.10 stuņdē.
Pasasokom žurejai par nūviertiejumu i aicynojam vysus iz myusu izruodem latgaliski!
Foto: Santa Kļaviņa/Latgales vēstniecība GORS
