Režisoru Olega Šapošnikova i Edgara Māliņa oktobrī īstudātuo eksistencialuo drama “Peiļu medeibys” ir tragiskys stuosts par cylvāku, kurs nav dzeivuojs sovu dzeivi. Īstudiejuma pyrmuos izruodeišonys reizis Daugovpilī tyka sveicynuotys ar stuovaplausim i taidom skateituoju atsauksmem kai “vīna nu tūs izruožu, kas beidzās iz skotivis, bet turpynojās dūmuos”, “bravo teatram par drūsmi ar skateituojim runuot na tik par pateikamom lītom”. Janvarī teatris nūdūs izruodi Reigys skateituoju viertiejumam.
Izruodis pamatā ir dramaturga Aleksandra Vampilova luga, kurā autors pīsavierss cylvāka īškejai vīntuleibai, tukšai eksistencei i tykumiskai degradacejai. Dorba centrā ir treisdesmitgadeigs veirīts Viktors Zilovs, kuram, kai redzīs, nikuo natryukst: jam ir dorbs, jauns dzeivūklis, draugi i meiļojūša sīva. Tok aiz uorejuos labkluojeibys globojās cylvāks, kurs najiut pīpiļdejuma nivīnā nu dzeivis jūmu. Nasaverūt iz acimradzamū naapmīrynuoteibu ar ap sevi izbyuvātū dzeivi, jis turpynoj plyust pa straumi, aizpyldūt īškejū tukšumu ar alkoholu, uorlauleibys sakarim i sapynu par veiksmeigom peiļu medeibom.
“Problemys pamozam puorjam juo dzeivi, i apleicejī apstuokli vys skaidruok signalizej, ka itai turpynuotīs vaira navar. Tok jis beistās īsavērt sevī, naspiej pīzeit sovys vainis i uzajimt atbiļdeibu par pīlaistajom klaidom. Peiļu medeibys Zilovam palīk par naaizsnādzamuo mīra simbolu,” stuosta golvonuos lūmys atveiduotuojs Miroslavs Blakunovs.
Rodūšuo komanda skaita, ka, koč i nu lugys pīraksteišonys ir paguojs vaira par 50 godu i sabīdreiba ir izguojuse cauri sistemu, vierteibu i orienteru maiņai, itys dorbs vys vēļ izskaņ osai. Režisors Olegs Šapošnikovs stuosta: “Itamā lugā ir uzskotamai paruodeita cylvāka pakuopeniska izdzisšona, dvēselis nuove. Tys itūšaļt ir cīši aktualai. Byutu ideali, ka kotrys skateituojs varātu atpazeit sevī koč kū nu golvonuo varūņa Zilova, kam kotrā nu myusu ir nazkas mirs.”
Izruode “Peiļu medeibys” nūteik krīvu volūdā ar tulkuojumu latvīšu volūdā titrūs. Ilgums: 3 stuņdis (divejūs cielīņūs). Īsokoma skateituojim nu 16 godu vacuma.
Izruodis režisors ir Edgars Māliņš, režisors inscenātuojs i muzykaluo nūformiejuma autors – Olegs Šapošnikovs, scenografe i kostimu muokslineica - Inga Bermaka, gaismu muokslinīks – Sergejs Vasiļjevs. Lūmuos: Miroslavs Blakunovs, Kristīna Zaharova, Kristina Tiško, Natālija Kotona, Jevgenijs Mihailovs, Aleksandrs Komarovs, Vanda Gibovska, Viktors Jancevičs, Eduards Beļnikovs, Vladislavs Vasiļjevs, Artjoms Sigajevs.
Bileti: “Biļešu servisa” kasēs i škārsteiklā www.bilesuserviss.lv.
