Daudzu godu garumā Daugovpiļs teatra Jaungoda koncerts ir palics par vīnu nu skateituoju gaideituokūs nūtikšonu. Ari ituo gods golā teatris aicynoj skateituojus iz svātku koncertu, kas itūreiz nūtiks jaunā vītā – Daugovpiļs Kulturys pilī.
Tai kai pīprasejums ir tik lels, ka bileti iz itū pasuokumu teik izpierkti momentanai i daudzim interesentim izpalīk vareiba tū apmeklēt, itūgod Daugovpiļs vaļstspiļsātys pošvaļdeibys dūme ir pīškeiruse teatram vareibu koncertu puorceļt iz Daugovpiļs Kulturys pili, kas ļaus uzjimt aptyvai divejis reizis vaira apmaklātuoju nakai da ituo i maksimali apmīrynuot Daugovpiļs i Latgolys dzeivuotuoju gribiešonu apmeklēt koncertu.
Koncertā skanēs īmeiļuotys dzīsmis nu teatra repertuara izruožu i pasaulī zynomi hiti. Iz skotivis kuops teatra dzīdūšī akteri i vīsmuokslinīki, bet programu papyldynuos deju i cyrka muokslys prīšknasumi. Naizpaliks ari jautra atsavieršona iz 2026. gods spūdruokajom nūtikšonom, kai ari gaiši vieliejumi, kūpā sagaidūt Jaunū godu.
Jaungoda koncerts nūtiks:
• 28. decembrī 19.00 stuņdēs;
• 29. decembrī 19.00 stuņdēs;
• 30. decembrī 15.00 i 19.00 stuņdēs;
• 3. janvarī 19.00 stuņdēs.
Biletu puordūšona suoksīs 11. novembrī 12.00 stuņdēs kai škārsteiklā, tai kasē.
Tai kai paguojušajā godā vairuoki skateituoji iz Jaungoda koncertu īsaroda ar nadereigim biletim, teatris aicynoj sorguotīs nu kruopnīku i biletus īsaguoduot tikai oficialuos tierdznīceibys vītuos. Nu napazeistamu personu pierkti bileti var byut vyltuoti voi puordūti vairuokim cylvākim. Teatris nauzajam atbiļdeibu par biletim, kurus skateituojs nūpiercs ar storpnīka paleigu.
Biletus var nūpierkt Daugovpiļs teatra kasē, Daugovpiļs Kulturys piļs kasē, “Biļešu paradīzes” kasēs vysā Latvejā i škārsteiklā www.bilesuparadize.lv.
