27. aprilī Daugavpiļs teatra Eksperimentalajā zālē krīvu volūdā nūtiks pyrmizruode komedijai „Vacuokīs dāls” – vīna nu Staņislava Broka Daugavpiļs muzykys vydusskūlys aktīru kursa diplomdorbu izruodem.
Šūvosor pēc divu godu apvuiceibys Staņislava Broka Daugavpiļs muzykys vydusskūlys pirmījam aktīru kursam nūtiks izlaidums. Vysus tūpūšūs aktīrus Daugavpiļs teatra skateituoji varēja īpazeit eksperimentaluo īstudiejuma „Vyspyrms beja…” pyrmizruodē pārnījā aprilī. Vairuokums ituo aktīru kursa audziekņu ir Daugavpiļs teatra dejuotuoji, kas muoceibu laikā pylnveidoja sovys aktīrmuokslys prasmis, tūmār daļa jaunīšu ari spēra pyrmūs sūļus profesionaluo teatra pasauļī. Izruode „Vacuokīs dāls” vysym uzvadumā spieliejušīm studentim byus pyrmīs aktīrmeistareibys puorbaudiejums.
„Vacuokīs dāls” ir vīna nu pīcom dramaturga Aleksandra Vampilova ( 1937- 1972) pilnapjūma lugom. Sovūs dorbūs aurors prota meistareigi attāluot cylvāka saražgeitū, pretruneigū dobu, saveit tragiskū ai komiskū, dīniškījā saredzēt byutiskū. Par tū nareti saleidzynuots ai A. Čehovu i raksturuots kai vīns nu 20. godusymta izcyluokīm dramaturgim. A. Vampilova lugys samārā bīži īstudeitys Latvijis teatrūs, tūstorp Daugavpilī – te 2021. godā Endīne Bērziņa kai sovu diplomdorbu režijā īstudēja diptiha „Provinces anekdoti”pyrmū daļi „ Gadiejums ai metranpažu”. Niu cyts A. Vampilova dorbs Daugavpiļs teatrī atkuortuoti izmontots vēļ vīnam diplomdorbam.
Lai naktī svešā piļsātā napayktu uz īlys, Busigins i Silva izdūmoj, ka Busigins byus vīna dzeivūkļa saiminīka uorlauleibys dāls. Zynoms, ka ai vuordu īspiejams gon nūnuovēt, gon atdzeivynuot. Taipat škytami navaineigs jūks pamateigi sabongoj vasalys gimines dzeivi. Lai vyss otkon byutu kai īprīkš, izruodes daleibnīkim vajadzēs škatynuot tāvu i dālu, lauleibys i pat vairuoku paaudžu sadzeivis problemys.
Īstudiejuma „Vacuokīs dāls”režisors ir vīns nu aktīru kursa pedagogim – Edgars Māliņš, sovulaik Moskovys akademiskuo Dailes teatra (MHAT) skūlā- studijā muociejīs daugavpiļīts. Sovukuort izruodes muokslinīciskīs vadeituojs ir Oļegs Šapošņikovs. Kūpā ai aktīru kursa audziekņim Artjomu Afanasjevu, Miroslavu Blakunovu, Jevgeņiju Mihailovu, Aleksandru Koguci, Kristinu Tiško i Vladislavu Vasiļjevu izruodē spielēs Daugavpiļs teatra aktīrs Mihails Samodahovs. Izruodes scenografs ir Edgars Viļumovs, kostimu muokslinīks – Gatis Timofejevs, Gaismu muokslinīks – Sergejs Vasiļjevs.
Pyrmizruode – 27. aprilī plkst 18.30; nuokamuos izruodes 30. aprilī plkst 17.00, 6. majā plkst. 17.00, 20. majā plkst 15.00.
Beleti: Daugavpiļs teatra kasē ( 654 26520), „Biļešu paradīze” kasēs, taipat internetā www.bilesuparadize.lv
