Jau vairuokus godus Daugovpiļs teatris mierktīceigai paplašynoj storptautyskū sadarbeibu, kai aicynojūt vīsmuokslinīkus nu cytu vaļstu, tai veicynojūt teatra atpazeistameibu Eiropys Savīneibā, nareši sadarbeibai meklejūt regionus ar radnīceigom īzeimem i izaicynuojumim. Tai, pīmāram, naseņ teatrī topa īstudiejums “Kaids nūteikti atīs”, kura pamatā ir norvegu rakstnīka Juna Fosis luga, kas pīraksteita jaunnorvegu volūdā (nynorsk) i kurū, leidzeigai kai latgalīšu volūdu, kasdīnā lītoj nalela sabīdreibys daļa.
Saradzūt i Sicilejis regionā leidzeibu ar Latgolu, Daugovpiļs teatris pārņ beja aizsuocs puorrunys ar vairuokim teatrim itymā Italejis regionā. I pavysam naseņ, februara beiguos, nūtyka veiksmeigys sarunys ar Noto i Sirakuzu piļsātu vadeituojim i tyka paraksteiti sadarbeibys leigumi. Tūs ītvorūs 9. aprelī Daugovpiļs teatris ar izruodi “Nūdzeitus zyrgus nūsaun” gasteis teatrī “Tina Di Lorenzo” Noto piļsātā, bet 10. aprelī – teatrī “Massimo” Sirakuzuos.
.jpg)
Izruode “Nūdzeitus zyrgus nūsaun” ir kusteibu izruode, kas veiduota piec amerikaņu rakstnīka Horasa Makoja romana „They Shoot Horses, Don't They?” motivu. Tamā atspīgeļuots ilgstūšs deju maratons, kura dalinīki, izmysuma vadeiti, ir gotovi iz vysu, kab dabuotu apsūleitū laimastu. Horeografe Irina Bogeruka par dorbu itamā izruodē sajēme “Spēlmaņu nakts” bolvu kategorejā “Goda horeografs”. Izruode beja puorstuovāta i divejuos “Dejis bolvys” nominacejuos.
Ituos sadarbeibys ītvorūs daugovpilīšim tiks duovuota vareiba īpasazeit ar Sicilejis teatra muokslu, kam junī teatris “Tina Di Lorenzo” brauks vīsizruodēs iz Daugovpili, teatra festivala laikā izruodūt Oracio Kondorelli (Orazio Kondorelli) īstudiejumu sicilīšu volūdā “Alla Furca”, kura viestej par progareibu i olkys piec varys. Vaira informacejis par festivala izruodem sekuos.
Daugovpiļs teatra vīsizruodis Sicilejā nūteik ar Daugovpiļs vaļstspiļsātys pošvaļdeibys i mecenata Aleksandra Vasiļjeva finansialu paleigu.
