Sidalinnys teatra izruožu cyklys “Puosokys nu molu molu” īpazeistynoj bārnus ar vysaidu vaļstu kulturu, tradicejom i īrodumim, i ar izruodis “Hušams i viejs” starpnīceibu teatris aicynoj bārnus nu 5 da 10 godu vacuma iz sasatikšonu ar ebreju kulturu. Tys ir jautrys stuosts par mozu puiškinu, kurs ceļā iz tiergu piec īpierkumu mādz vysu sajaukt. Tok, ka i jis izdora nazkū napareizi, puika zyna, ka sātā jū gaida meila saime, kura jū nalomuos.
Izruodis veiduotuoji ir puorlīcynuoti, ka mīlesteibys i pījimšonys vuordi šaļtim ir daudz vierteiguoki nakai notacejis i taišni vareiba pīlaist klaidys snādz tik vierteigū breiveibu izzynuot pasauli.
Izruode nūtiks 7. februarī 13.00 stuņdēs i 8. februarī 12.00 stuņdēs Daugovpiļs teatra Eksperimentalajā zālē. Izruode byus krīvu volūdā, skateituojim tiks nūdrūsynuots īskots izruodis saturā latvīšu volūdā.
Taipat 8. februarī Sidalinnys teatris nospēlēs muzykalu izruodi piec Federiko Fellīni kinys “Kabirejis nakts” motivu, kurā skaņ maestro Raimonda Paula muzyka. Kabirejis stuosts ir viestejums par suopeigu konfliktu storp atkluotu, patīsu cylvāku i vīnaldzeigu apleicejū pasauli, kurā ciļvieciskuos vierteibys teik nūnycynuotys. Tei ir muzykala izruode par lobū i nalobū golvonuos varūnis dzeivē, kura par speiti gryuteibom, nūdeveibai i lelpiļsātys nažieleibai napagaisynoj cereibu i meklej sovu mīlesteibu. Izruodi Sidalinnys teatrī iestudējs Sergejs Golomazovs, libreta autore ir Jelena Sigova.
Izruode nūtiks 15.00 i 19.00 stuņdēs Daugovpiļs teatra Lelajā zālē. Tei byus krīvu volūdā ar tulkuojumu latvīšu volūdā titrūs. Izruode ir paradzāta skateituojim nu 14 godu vacuma.
Iz Tallinu Daugovpiļs teatris vess divejus dažaidu žanru īstudiejumus. Muzyklys “Džeina Eira” ir vīns nu popularuokūs teatra īstudiejumu, kurs topa 2018. godā i vys vēļ teik spālāts pylnā skateituoju zālē. Taipat Tallinā tiks nūspālāta izruode “Vacuokais dāls”, kura pīruodeja sevi kai lobu akterdorbu paraugs i sajēme divejis “Spēlmaņu nakts” nominacejis - „Goda akters” i „Goda akters ūtruo plāna lūmā”.
Daugovpiļs teatris pasasoka teatra atbaļsteituojam - kompanejai “Skinest Rail”.
Teatris izsoka sirsneigu pateiceibu Daugovpiļs vaļstspiļsātys pošvaļdeibai, kurys finansialais paleigs nūdrūsynoj Daugovpiļs teatra vīsizruodis Tallinā i Sidalinnys teatra vīsizruodis Daugovpilī.
