23. novembrī Dailis teatrī padūtys kasgadejuos “Spēlmaņu nakts” goda bolvys teatrī. Daugovpiļs teatra horeografe Irina Bogeruka sajēme bolvu kai goda horeografe voi kusteibu muokslineica par dorbu izruodē “Nūdzeitus zyrgus nūsaun”.

Irina Bogeruka ir bejuse nomināta “Spēlmaņu nakts” bolvai četrys reizis (par horeografeju izruodē „Damu paradize” 2011./2012. gods sezonā, „Vosorys saulgrīžu burvesteibys” 2012./2013. gods sezonā, „Parunuosim?” 2015./2016. gods sezonā i “Nūdzeitus zyrgus nūsaun” 2024./2025. gods sezonā), tok tei ir pyrmuo reize, kod jei ir sajāmuse itū bolvu.

Sovā runā Irina izsaceja pateiceibys vuordus izruodis komandai, teatram i skateituojim. Nuokušajā reitā jei pasadaleja ar emocejom: “Tei ir koč kaida breinumaina izruode, kura ir izguojuse cīši garu ceļu - traumys, pyrmizruodis puorceļšonu, vysi tamā īsaisteitī ir īlykuši tik daudz dorba, energejis i vieliešonuos, kab tei sasatyktu ar skateituoju… Deļtuo es tū nauztveru kai personeigū bolvu - vysa komanda itamā izruodē ir īlykuse sovu dvēseli. Īspiejams, taišni partū tei pamat taidu palīkūšu īspaidu iz skateituojim. Prūtams, es lapnojūs ar sevi, kam veiduot itai izruodei horeografeju beja izaicynuojums. Atkluoti sokūt, es nimoz nacerieju, ka eistyn varātu sajimt bolvu. Vys vēļ naspieju tam nūticēt i jiutu miļzeigu saviļņuojumu. Nazkū leidzeigu pīredzieju tik tod, kod Marija Naumova, kurai veiduoju horeografeju, uzvarēja Eirovizijā. Asmu bezgola pateiceiga vysim i cīši lapnojūs ar myusu teatri i vysu myusu komandu.”

Izruodē “Nūdzeitus zyrgus nūsaun” atspīgeļuots ilgstūšs deju maratons, kura dalinīki, izmysuma vadeiti, ir gotovi iz vysu, kab dabuotu pasūleitī laimastu. Mali, baile, nūdeveiba i gūdkuore pamozam pīsuotynoj gaisu šovā, kura kotru šaļti kuoreigai giun skateituoji. Konkurss puorsavierš seivā ceiņā par vītu zam saulis, i tim, kas naspiej atsasaceit nu sapyna par lelū laimastu, daīt zīduot daudz vaira, nakai jī beja suokumā dūmuojuši. Nuokušuo izruode nūtiks 7. decembrī.

IRINA BOGERUKA, MEIĻOJAM I LAPNOJOMĒS!

‍