Viesturneica, žurnaliste Laura Melne sovā ekspresrecenzejā Kroders.lv atzeimoj, ka izruode “Hekube” “nūteikti ir nūzeimeigs sūļs iz prīšku latgaliskuo teatra atteisteibā”. Sovutīs teatra kritike Zane Radzuobe (Radzobe) sovā Facebook profilā eipaši atzeimuojuse golvonuos lūmys atveiduotuojis akterdorbu: “Jūlija Ļaha ir fantastiski loba! Tok ari izruode taida ir, pat par speiti atseviškim tryukumim. Es beju tik olkona piec jaudys, spāka, pamateiguma teatrī, ka gondreiž vaira nacerieju! I tai kai sezona jau pusē, es jums drūsai apgolvoju: tei byus vīna nu ituos sezonys viersyuņu!”
Izruodis centralais varūņs ir Trojis vaļdineica Hekube, kura piec kara ir pagaisynuojuse vysu: veiru, trūni, breiveibu i, pats tragiskuokais, gondreiž vysus sovus bārnus. Kod redzīs, ka suopem vaira nav vītys, vīnu piec ūtra jei pīdzeivoj vēļ divejus liktiņa trīcīņus, piec kurūs Hekube vaira naspiej pacīst apleik pastuovūšū nataisneibu i ir gotova kūst preteimā. Nūdeveibys suopēs i izmysumā dzymst juos olkys piec taisneigys atmoksys. Rodūšuo komanda skaita, ka “Hekube” ir stuosts na viņ par daudz puorcītušu sīvīti, tok ari par spieceigu personeibu, kura spiej stuotīs preteimā nataisneibai i tiranejai.
Eiripida tragedejis darbeiba nūteik nailgi piec Trojis krisšonys, tok tuos viestejums par kara sakom šudiņ izskaņ eipaši skaudri, deļtuo ari materiala atlasis laikā režisoris izvēle kryta taišni iz itū lugu. “Tei ir luga par gora breiveibu i verdzeibu. “Hekube” ir paradoksala metafora par tū, kai kara apstuokļūs puorsamej myusu prīškstoti par draudzeibu i naidu, vīnaldzeibu i leidzjiuteibu, varūneibu i cālumu, zemiskumu i nūzīgumu. Kars napamat nikaidu iluzeju. Tymā nav uzvarātuoju, i tuo susātivs snādzās puori cylvākim vēļ ilgi piec tuo beigu,” stuosta režisore, kurai tys beja pyrmais režejis dorbs Latvejā.
Kūpā ar režisori pi īstudiejuma tapšonys struoduoja dramatiziejuma autore Kristīne Veinšteina, scenografs Marijus Jacovskis (Leitova), kostimu muokslineica Inga Bermaka, gaismu muokslinīks Sergejs Vasiļjevs, muzykaluo konsultante Alisa May.
Izruodē pīsadola: Jūlija Ļaha, Eduards Beļnikovs, Marks Šelutko, Agnese Laicāne, Margers Eglinskis, Kristīne Veinšteina, Egils Viļumovs, Ritvars Gailums, Zanda Mankopa, Alisa May, Inese Ivulāne-Mežale, Kristaps Saulītēns, Kaspars Krauklis.
Nuokušuo izruode: 16. janvarī 18.30 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
