Izruode viestej par muoti i meitu, kurys kasdīnys skrītynā gondreiž nasasateik, partū vysa jūs saziņa nūteik ar zeimeišu starpnīceibu, kuruos teik pamastys iz ladusskapa durovom. Ar kotru dīnu naizrunuotuo palīk vys vaira, i tys kruojās kotrys sirdī eistyn kai zeimeitis iz ladusskapa durovom. Naziņa i baile izviermoj, kai īprīšk ruodejuos, bezryupeigajā sarakstē, kod obeju dzeivē īīt nalyugts gosts – muotis smoguo slimeiba.
„Verūtīs nu molys iz obeju varūņu attīceibom, ir sajiuta, ka šaļtim tryukst vīgla gryudīņa, kab itī diveji vīns ūtru meiļojūšī cylvāki beidzūt sasatyktu i obejom tik cīši vajadzeiguo saruna nūtyktu. Komunikacejis gryuteibys tyvu cylvāku vydā – tei ir aktuala tema, i ir svareigai, ka varim runuot par tū ar skateituojim,” puordūmuos doluos aktrise Agnese Laicāne, kura izruodē attāloj meitu Klēru.
.jpg)
“Īstudiejums “Dzeive iz ladusskapa durovom” ir pīaugšonys stuosts, kurū caurstruovoj attuolynuotuos komunikacejis soltums i kurū skaudrai padreizynoj muotis pieškuo aizīšona nu dzeivis. Izruode kai jaunīšim, tai pīaugušajim kolpoj kai syurs atguodynuojums, ka itys laiks ir vīneigais laiks, kas dūts,” roksta teatra kritike Kitija Balcare.
Izruodis pamatā ir angļu rakstneicys Alisis Kuiperis pyrmais i iz reizis ari lelu popularitati vysā pasaulī dabuojušais romans ar taidu pošu nūsaukumu. Tik dažu godu laikā tys tyka tulkuots i izdūts vaira nakai 20 vaļstīs. Latvīšu volūdā romans Inesis Vīksnys tulkuojumā izguoja 2010. godā, sovutīs 2012. godā romans izapeļneja 2. vītu Bārnu i jaunīšu žurejis viertiejumā 8. i 9. klašu vacuma grupā.
Īstudiejuma “Dzeive iz ladusskapa durovom” kostimu muokslinīks i scenografs ir Egils Viļumovs, gaismu muokslinīks - Sergejs Vasiļjevs, dramatiziejuma autori – Māris Korsiets, Egils Viļumovs. Izruode paradzāta skateituojim nu 12 godu vacuma.
Bileti: Preiļu Kulturys noma kasē, “Biļešu paradīze” kasēs i www.bilesuparadize.lv
