“Itei sezona ir eipaša ar tū, ka tei byus storptautyskys sadarbeibys zeimē – saleidzynuojumā ar īprīškejom sezonom byus nabejs daudz vīsizruožu uorzemēs, kai ari vairuoki režisori uorzemnīki, kuri gasteis pi myusu,” stuosta teatra direktors Olegs Šapošnikovs.
Skateituojim sovys durovys teatris attaiseis 5. septembrī, sovutīs pyrmais jaunīstudiejums gaidoms 26. septembrī, kod pyrmizruodi pīdzeivuos jauna kabare šova programa “Cabaret Dinaburg 2.0”, kurā meisīs muzykali prīšknasumi dzeivā izpiļdejumā, jutekliskys dejis i cyrka muoksla.
Taipat septembra golā skateituojim tiks duovuota vareiba nūsavērt Stanislava Broka Daugovpiļs Muzykys vydsškolys itūvosor absolviejušuo akterkursa diplomdorba izruodi “14 dīnys da paradizis”, kura ir baļsteita audziekņu sacarātajūs stuostūs par patversmē tykušūs suņu liktinim. Izruodis režisors i dramatiziejuma autors ir Vadims Bogdanovs.
Sezonys suokuos paradzātys ari vairuokys vīsizruodis. Septembrī izruodis “Nūdzeitus zyrgus nūsaun” i “Cytugod tymā pošā laikā” varēs nūsavērt Mihaila Čehova Reigys Krīvu teatrī, sovutīs oktobrī Daugovpiļs teatris gasteis Latvejis Nacionalajā teatrī ar izruodi “Kaids nūteikti atīs”. Festivalūs Leitovā pīsadaleis izruodis “Nūdzeitus zyrgus nūsaun” (Biržūs) i “Cytugod tymā pošā laikā” (Viļņā). Sovutīs Daugovpiļs teatrī septembrī varēs nūsavērt festivala “Homo Novus” izruodi “Varys spēle” i Mihaila Čehova Reigys Krīvu teatra izruodi “Sūleņš”. Februarī teatris dūsīs vīsizruodēs iz Tallinu, bet iz Daugovpiļs teatra skotivis kuops akteri nu Sidalinnys teatra (Südalinna teater).
Dreiži Daugovpiļs teatrī tiks aizsuokts dorbs pi senejūs greku dramaturga Eiripida tragedejis “Hekabe”, kura tiks īstudāta latgaliski. Stuosts par Trojis vaļdineicys puortapšonu nu sagrautys sīvītis par atrībieju tiks par režisoris Tatjanys Bogdanys (Fraņceja) debejis dorbu Latvejā. Izruodis rodūšajā komandā ir scenografs, Leitovys Bruninīka krysta ordiņa kavalers Marijus Jacovskis (Leitova) i kostimu muokslineica Inga Bermaka. Pyrmizruode nūtiks novembra suokuos.
Itūsezon repertuaru papyldynuos ari komponista Jāņa Lūsēna i dzejnīka Pētera Brūvera muzyklys “Agruo ryusa”, kura pamatā ir Elīnys Zālītis romans, kas stuosta par jaunys lauku mārgys dzeivis leiklūčim 30. godu Latvejā. Lūmuos – Daugovpiļs teatra solisti i daži vīsmuokslinīki.
Teatra jaunuokajim skateituojim tiks saryupāts izbraukuma izruodis “Plykspuorneiša puorsacenis” turpynuojums. 40 minutu ilgys izruodis laikā suokumškolys bārni varēs īpazeit latgalīšu puorsoku pasauli, naizīmūt nu klasis. Itymā pīdzeivuojumā jūs pavadeis diveji puorsoku tāli – Plykspuorneits i Vabaleite.
Nalaužūt ilggadejū tradiceju, sezonys pyrmuo puse tiks nūslāgta ar Jaungoda koncertu. Sezonys zīmys-pavasara pūsmā teatrī struoduos režisors Herberts Laukšteins i dāņu režisors Kims Bjarke.
Bileti iz izruodem septembrī i oktobrī jau ir puordūšonā. Biletus var nūpierkt Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
Foto: Džeina Saulīte
