Izruodis pamatā ir 18. g. s. īvārojamuokuo skandinavu autora Ludviga Holberga luga “Den stundesløse”, kurā izsmīta īdūmuota aizjimteiba, bezjiedzeiga birokrateja i tukša prācavuošona. Vilgešreja kungs ir cīši aizjimta i uorkuorteigai nūzeimeiga persona, vysmoz jis pats tai skaita. Jis ir pasūlejs sovys meitys rūku gruomatveža dālam, tok Leonorys sirds pīdar cytam jaunekļam. Kab nūvārstu nalaimi, situaceju matās gluobt kolpyune Pernille, kurai padūmā ir viļteigs plāns. Ironiskai, ka ituo plāna panuokuma atslāgs ir taišni Vilgešreja myužeiguo aizjimteiba.
Izruodi īstudej pīredzis boguots režisors Kims Bjarke – jis ir īstudējs ap 120 izruožu Skandinavejā, puorsvorā Dānejā i Norvegejā, tymā skaitā Kopenhagenys Karaliskajā teatrī, Norvegejis Nacionalajā teatrī, Bergenys teatrī “Nacionālā skatuve” i cytur, kai ari ostoņus godus beja Oslo Jaunuo teatra muokslinīcyskais vadeituojs. “Cīši svareiga persona (VIP)” ir juo pyrmais režejis dorbs Latvejā.
Kims Bjarke izruodis golvonajā varūnī saredz paralelis ar sabīdreibā plaši izplateitu problemu: “Vilgešrejs vysod ir ceļā iz kaidu nūsadorbuošonu, tok pat mozuokais seikums var nūvērst juo viereibu, i tod jis laižās jaunā vierzīnī. Jam ir gryuteibys koncentrētīs, tryukst spiejis pastyprynuotai fokusētīs iz koč kū vīnu. Tik ituos sovpateibys viņ padora jū par myusdīneigu i vīglai atpazeistamu varūni: napuortrauktuo telefona satura rytynuošona, laksteišona nu vīnys nūdarbis iz cytu ir myusu dīnu sabīdreibai rakstureigys īzeimis.”
Skateituojus sagaida izruode ar delartiskuos komedejis elementim, kas nūzeimoj, ka tamā byus ekspresiva akterspēle, spūdri tāli, kostimi i grims. Izruodis scenografe i kostimu muokslineica ir Inga Bermaka, muzykys autors – Aleksejs Fedotovs, gaismu muokslinīks - Sergejs Vasiļjevs. Lugys tulkuojumu nūdrūsynuojuse Volūdu sāta, tū lokalizējs Aleksandrs Komarovs.
Lūmuos: Vadims Bogdanovs, Jelena Netjosina, Kristina Tiško, Eduards Belnikovs, Miroslavs Blakunovs, Irina Kešiševa, Vladislavs Vasiļjevs, Mihails Samodahovs, Viktors Jancevičs, Nikolajs Gedzjuns, Aleksandrs Komarovs, Ritvars Gailums, Milena Savkina, Inese Ivulāne-Mežale, Zanda Mankopa, Kristīne Veinšteina.
Izruode nūtiks krīvu volūdā, skateituojim tiks nūdrūsynuots tulkuojums latvīšu volūdā titrūs lītuotnē “Teātru titri”. Izruodis ilgums: 2 stuņdis 30 minutys (divejūs cielīņūs).
Īstudiejums tūp ar Daugovpiļs vaļstspiļsātys pošvaļdeibys i Zīmeļvaļstu Ministru Padūmis biroja Latvejā atspaidu.
Pyrmizruode – 15. majā 18.30, nuokušuo izruode – 16. majā 18 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
