Izruodis veiduotuoji aicynoj izbaudeit energisku, nažieleigu i jautru civilizacejis golu. “Atkluotā jiurā” ir absurda komedeja, kur treis olkoni džentlmeni atsarūn jiurā iz plūsta. Piec vairuoku jautru manipulaceju tik demokrateja var paleidzēt jim izsprīst – kurs byus nuokušuo maļteite. Režisors izruodē izmontoj boguoteigus teatra elementus, koncentrejūtīs iz natradicionalu scenografeju i plotu teatra volūdu.
“Nikaida realisma – horeografiski sarežgeits, ritmiski precizs izvadums ar konsekventi izturātu atsvešynuotu spēlis stylu, kurā pamozam īsasyuc patīsys jiutys. Vuordu “īsasyuc” lītoju partū, ka iudiņs beja svareiga izruodis metafora – i okeana radeituo bezgaleiba, kurā sevkurs ir vīntuļa sola, i osorys, ar kurom lieneišam pīsapylda skuorda vanneitis, pa kurom brodoj treis iz solys īstrāgušys storpdzymumu byutnis,” roksta teatra kritike i zynuotneica Edīte Tišheizere.
Birmingemys Mozais teatris ir dybynuots 2018. godā Anglejis vidīnē i ir pagūdynuots nest izcyluos latvīšu teatra zynuotneicys Līvijis Akurāteris vuordu. Tuo muokslinīcyskais vadeituojs ir režisors Ingmārs Čaklais. Birmingemys Mozais teatris regulari reikoj atkluotys meistarklasis, pīsadola teatra festivalūs Apvīnuotajā Karalistē, Latvejā i cytur pasaulī, kai ari uztur cīšys sadarbeibys saitis ar leidzeigai dūmojūšim teatrim i kulturys organizacejom. Birmingemys Mozais teatris ir Pasauļa Latvīšu amateru teatru savīneibys (PLATS) dybynuotuojs.
Izruodis “Atkluotā jiurā” rodūšuo komanda: režeja i scenografeja - Ingmārs Čaklais, horeografeja - Alda Skrastiņa, tārpi - Gunta Lārmane i Selīna Briežkalna, gaismu operators - Kristaps Kalnietis, skaņu operators - Māris Roberts Čaklais, video - Asatuurs Keim i Elza Umure. Lugu nu pūļu volūdys tulkuojuse Sandra Bondarevska. Lūmuos: Katrīna Tamisāre, Elza Umure, Dace Čaklā, Ināra Ugore i Dināra Klepere.
Izruode nūtiks latvīšu volūdā, tuos ilgums – 2 stuņdis 15 minutys (vīnā cielīnī).
Bileti - Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.
