Latgalīšu kulturys goda bolvys "Boņuks" padūšonys ceremonejā 14. martā Latgolys viestnīceibā "Gors" gūdynuotys desmit aktivuokuos, spūdruokuos i nūzeimeiguokuos nūtikšonys, personeibys i aktivitatis, kas eipaši boguotynuojušys latgaliskū kulturu. Laureatu vydā ir i Daugovpiļs teatra aktrise Kristīne Veinšteina.

Kristīne navarēja byut kluotyn ceremonejā, kam tamā dīnā, kai soka poša aktrise, dareja tū, kas jai vysuvaira pateik – prīcynuoja skateituojus pyrmizruodē Daugovpiļs teatrī. “Boņuka” bolva jau ir tykuse Kristīnis rūkuos, i jei syuta žurejai paļdis vuordus par augstu nūviertiejumu, Daugovpiļs teatram par vareibu radeit, dareit i kūpā augt, kai ari vysim lelajim i mozajim latgalīšu pasuokumim, kur var apzynuot latgalīšu dyžgora Juoņa Streiča pīmynātū latgalīšu dyžciļteibu.

Kristīne Veinšteina ir Daugovpiļs teatra aktrise, kurū varātu saukt par vīnu nu teatra latgaliskuos identitatis styurakmiņu. Sovys rodūšuos darbeibys laikā jei naskaitomys reizis ir eistynuojuse teatra pasuokumus, tulkuojuse lugys, taisejuse scenarejus i sacerējuse dzīsmis latgalīšu volūdā. Jei ir i tys cylvāks, kurs paleidz cytim akterim vuiceitīs latgalīšu volūdu i izkūpt tuos skaniejumu. 2025. godā ar Kristīnis paleidzeibu Daugovpiļs teatrī topa diveji nūzeimeigi īstudiejumi – izbraukumu izruode bārnim “Plykspuorneiša puorsacenis” i senejūs greku tragedeja latgaliski “Hekube”.

Vysi itī pīmāri nav tik dorba pīnuokumu izpiļdeišona, tys ir Kristīnis sirds aicynuojums i eistyna degšona par latgalīšu volūdu teatrī, Daugovpilī i Latvejā. Bīži viņ itaids aizkulišu dorbs palīk napamaneits, tok teatris cīši nūviertej Kristīnis īguļdejumu latgalīšu volūdys populariziešonā i kūpšonā i prīcojās, ka i Latgalīšu kulturys goda bolvys "Boņuks" žurejai tys nav palics naīvāruots.

Kristīņ, sveicynojam i asam nu sirds lapni!

‍