Muzykla pamatā ir Elīnys Zālītis romans “Agruo ryusa”, kurā paruodeita 1930. godu Latveja. Golvonuo varūne Elza ir nabadzeibā dzymuse jauna mārga, kurys nanūbrīdušajā apziņā pilīni pa pilīņam kruojās cytu redzīni, kas nūsluopej juos pošys sirdsbolsu. Vīgluokys dzeivis vylynuota, jei atsatūp zalta kruoteņā, i izaruoda, ka sirds vystik ilgojās piec patīsu jiutu. Tik izalaseišonys, kas padareitys sirds korstumā, bīži viņ prosa vysuduorguokū moksu.
Romans vaira zynoms piec tuo 1979. gods ekranizacejis. Piec tuo motivu radeits ari Jāņa Lūsēna i Pētera Brūvera muzyklys, kurs pyrmizruodeits 2007. godā Līpuojis teatrī. Tuo autori veiduoja sovu skotu iz itū dorbu – muzyklā Elzys mierkis nav tikt pi boguota veira i labi īsakuortuot, jei ir idealu vadeita. Tok sapyni par dzeivi golvyspiļsātā nūjiukst, i sarežgeitā šaļtī juos dzeivē pasaruoda Kikulis, kurs lyudz juos rūku i duovoj atslāgus iz lobuoku dzeivi. Ituo gods janvarī Daugovpiļs teatrī topa ituo muzykla catūrtuo skotiviskuo verseja, kuruos kotru izruodeišonys reizi skateituoji apbolvoj ar stuovaplausim.
Piec Daugovpiļs teatra “Agruos ryusys” nūsavieršonys komponists Jānis Lūsēns atsaziņs: “Piec dobys asu ciniks, deļtuo beju pateikamai puorsteigts – ir padareits vysulobuokais, kas viņ varēja byut. Breineigi, ka Olegs ir cīši skrupulozs maklātuojs, i, ka koč kū ari ir puormejs muzyklā, tod cīši motivātai tū darejs.”
Iz Latvejis Nacionaluo teatra skotivis kūpā ar Daugovpiļs teatra trupu kuops Katažina Dudareva (Elza), Sandis Ulpe (Kikulis), Artis Muižnieks (Italo), Maksis Krilovs (Straujups), Mariss Kirsis (Jānis).
Izruodis rodūšū komandu veidoj režisors Olegs Šapošnikovs, solistu vokaluo pedagoge Ilona Bagele, horeografis Irina Bogeruka i Anna Blakunova, scenografe i kostimu muokslineica Inga Bermaka, koncertmeistars Eduards Zariņš, aranžiejumu autors Jānis Lūsēns juniors i gaismu muokslinīks Sergejs Vasiļjevs.
Izruode nūteik latvīšu volūdā, tuos ilgums – 2 stuņdis 30 minutys (divejūs cielīņūs). Īsokama skateituojim nu 14 godu vacuma.
Bileti: „Biļešu paradīze” kasēs i škārsteiklā www.bilesuparadize.lv.
