Ituos sezonys laikā Daugovpiļs teatrī topa kabare izvadums “Cabaret Dinaburg 2.0”, senejūs greku tragedeja latgaliski “Hekube”, Jāņa Lūsēna i Pētera Brūvera muzyklys “Agruo ryusa”, sentimentala komedeja “Nazkod pylnašu zylgajā gaismā” i komedeja “Cīši svareiga persona (VIP)”. Teatris ir gastejs na tik Latvejā, bet ari Leitovā, Igaunejā i Itālejā. Sovutīs sezonys izskaņā Teatra festivala Nr.5 laikā uzjiems pi seve sešus teatrus nu Latvejis i uorzemu.
Kūpsapuļcis laikā teatra vadeiba izcēle ituos sezonys spūdruokūs akterdorbus, pīškirūt atzineibys rokstus akterim Zandai Mankopai (“Nazkod pylnašu zylgajā gaismā”), Margeram Eglinskim (“Agruo ryusa”, “Nazkod pylnašu zylgajā gaismā”), Kristīnai Zaharovai (“Agruo ryusa”), Agnesei Laicānei (“Hekube”), Egilam Viļumovam (“Hekube”) i Jūlijai Ļahai (“Hekube”). Šaļti pyrma atzineibys roksta padūšonys aktrisei Jūlijai Ļahai tyka paviesteiti “Spēlmaņu nakts” 2025./2026. goda sezonys bolvu nominanti. Tūs vydā ir ari aktrise Jūlija Ļaha, kura izvierzeita bolvai kategorejā “Goda aktrise” par Hekubis lūmu.
Teatra tradiceju kluostu papyldynuojuse Egila Viļumova bolva – aktera i muokslinīka poša taiseita bolva, kura teik pīškierta izruodēs vysubīžuok īsaisteitajim akterim. Itūgod itei bolva ir tykuse Zandys Mankopys i Miroslava Blakunova rūkuos.
Koč i sezonys nūslāguma kūpsapuļce ir nūvadeita, da jaunys sezonys suoku gaidoma vēļ vīna nūzeimeiga nūtikšona – Daugovpiļs teatra “Hekube” ir uzaicynuota pīsadaleit Storptautyskā senejūs greku dramys festivalā (International festival of Ancient Greek Drama), kurs nūteik Kiprā. Izruode tiks spālāta 10. i 11. julī Pafys (Pafosys) breivdobys amfiteatrī Senejā Odeonā.
Jaunu sezonu teatris atkluos augustā, kod suoksīs dorbs pi jaunu izruožu. Sovutīs durovys skateituojim Daugovpiļs teatris attaiseis 5. septembrī, atkluojūt sezonu ar komedeju “Cīši svareiga persona (VIP)”.
Jaunajā sezonā Daugovpiļs teatrī tiks īstudāta Aleksandra Vampilova “Peiļu medeibys”, izruode taps režisoru Edgara Māliņa i Olega Šapošnikova kūpradē. Teatra repertuaru papyldynuos Henrika Ibsena “Spūki”, kurūs īstudēs režisors nu Norvegejis Terje Skunsengs-Neudērs (Terje Skonseng Naudeer). Taps ari mozuos formys īstudiejums Vadima Bogdanova režejā. Sovutīs tyvuok Zīmyssvātkim iz Daugovpiļs teatra skotivis plānuota pyrmizruode Jāņa Lūsēna muzyklam bārnim “Eiksteite”, kurū īstudēs Olegs Šapošnikovs. Naizpaliks ari kasgadejais Jaungoda koncerts, kurs itūreiz maineis nūtikšonys vītu: kab duovuotu vareibu tū nūsavērt leluokam skateituoju skaitam, koncerts nūtiks Daugovpiļs Kulturys pilī.
Daugovpiļs teatra kolektivs soka paļdis skateituojim par naaizmierstamom emocejom ituos sezonys garumā i ar napacīteibu gaida sasatikšonu septembrī!
Bileti iz izruodem septembrī i oktobrī byus puordūšonā nu reitdīnys, 19. juņa. Biletus var nūpierkt Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
