Gogoļa lugys nūtykumi puorcalti myusdīnuos kaidā nalelā Latgolys piļsātā Sylagolā. Izruodē īpašīs latvīšu volūdys paveida kruošņums apvīnuots ar latgalīšu spylgtū mentalitati. Kūpā ar Daugavpiļs teatra aktīrim izruodē pīsadoluos Jānis Jarāns, Roberto Meloni, repers Bruolāns i folklorys kūpa „Rūžeņa”.
KKaidā Latgolys piļsāteņī mīrā i puorticeibā dzeivojušuos omotpersonys puorbīdej ziņa, ka dreizumā jūs varētu apmeklēt revidents. I vajag gadeitīs, ka tymā pošā laikā piļsātys vīsneicā apsamatušīs divi aizdūmeigu kungi… Vai tei byutu vīnkuorša sakriteiba? Kū daudz pruotuot – nuteikti byus gaideitī revidenti, mož, pat nu Briseles! Vītejuo vaļdeišona pījem lāmumu reikuotīs i situacejis gluobšonai puorsteigt svešinīkus ar vīsmīleibyus plyudim. Kas zyna, duovynuošana nuokūtnē atsamoksuosīs i dabuosi jaunu lobu omotu.
Sovukuort nadaudz nūblūdiejušī i finansialy stypri īrūbežuotī svešinīki dreiž saprūt, ka varēs laiceņi padzeivuot zaļi, i pīspielej Sylagola vīntīšim…
Kūpā ar Daugavpiļs teatra aktīrim izruodē pīsadoluos Jānis Jarāns, Roberto Meloni, repers Bruolāns i folklorys kūpa „Rūžeņa”, Daugavpiļs teatra trupys dejuotuoji.
Pyrmizruode: 2018. goda 24. novembrī