Izruodis nūtikšonys rysynojās Alvingu saimis golvys nuovis dasmytuos godadīnys prīškvokorā. Atraite Helene gatavejās atkluot buoriņu patversmi, kas nūsaukta veira vuordā. Par gūdu itai nūtikšonai sātā piec ilgys byušonys paceli Parizē ir atsagrīzs Alvingu dāls Osvalds. Muotis cereibys atjaunuot saikni ar dālu aizānoj paguotnis rāgi, kas itymā vokorā vojoj Alvingu sātys dzeivuotuojus stypruok nakai koč kod agruok.

Osvalds nūklusej eistū sovys atsagrīzšonys īmesli, sovutīs Helene globoj nu dāla patīseibu par juo tāvu. Vysu myužu jei raudzejuse saglobuot saimis navainojamū tālu, raugūt napīļaut, kab tāva grāki giutu dālu. Tok paguotni vaira nav īspiejams nūglobuot, i tuos sakys nav īspiejams nūvērst.

Henrika Ibsena 1881. godā saraksteituo luga “Rāgi” (zynoma ari ar nūsaukumu “Spūki”) palyka par vīnu nu tūlaik vyspretruneiguok vārtātūs dorbu – tei izraiseja osu kritiku i daudzi kur tū atsasaceja īstudēt. Myusu dīnuos “Rāgi” teik skaiteiti par vīnu nu Henrika Ibsena nūzeimeiguokūs i psihologiski niansātuokūs realisma dramaturgejis dorbu, kurā teik pieteitys taidys temys kai īdzimteiba i cikliskums, sabīdreibys spīdīņs i dubultstandarti, patīseibys i melu preteimā stateišona, breiveiba i tū īrobežojūšuos važys.

>>>

14+

Krīvu volūdā (titri latvīšu volūdā)

Leluos zālis skotive

Pyrmizruode: 2026. goda 7. novembrī

Izruodē teik izmontuoti skotivis dyumi!

‍

‍