Tautys puosokys ir pyrmais, kū skaita bārnim. Taišni tuos atbiļd iz byutyskuokajim augūša bārna vaicuojumim i snādz jam tykumeibys orienterus. Sidalinnys teatris turpynoj īpazeistynuot ar vysaidu tautu tradicejom i īrodumim, i itūreiz aicynoj iz sasatikšonu ar ebreju kulturu.

“Hušams i viejs” – vīna nu tūs puosoku, kurū naatrast nivīnā cytā kulturā, kai tik ebreju. Tys ir jautrys stuosts par mozu puiškinu, kurs ceļā iz tiergu piec īpierkumu var vysu sajaukt, tok juo bezgaleigajā fantazejā atsadzeivoj vasals pasauļs!

Ka i puika izdora kū nabejs napareizi, Hušams zyna, ka sātā jū gaida meila saime i tyvinīku atbolsts. Taišni vareiba pīlaist klaidys snādz mums breiveibu. Kod Hušams kuortejū reizi atsagrīž sātā nazkū sajaucs, jū sagaida ar vuordim: “Tu otkon vysu sajauci, tok mes tevi mīļojam taidu, kaids tu esi!” Dzierdēt mīlesteibys i pījimšonys vuordus šaļtim ir daudz vierteiguok nakai notacejis par tū, kai byutu bejs juodora pareizi.

Ebreju kultura, volūda i tradicejis vysaidā ziņā sasaglobuoja, pasasokūt tekstim i gruomotom. Režisors atzeimiejs, ka izruodis veiduotuoji puorsvorā baļstejuos dūmā, ka gruomotuos ir nūglobuots vasals pasauļs.

“Gruomotys ir ceļuojums, gruomotys – tys ir bezgola interesantai. Mes pasaceņtem, kab puosokainuo izruode burtiski izītu nu gruomotys puslopu. Maņ pi vysa ituo stuosta naivuma svareigi, ka Hušams nasabeist pīlaist klaidys, jis zyna, ka jū atbaļsteis, paskaidruos. I tys tok tai paleidz dzeivē! Maņ redzīs, ka taišni tys snādz vierteigū breiveibu izzynuot pasauli, mieginuot, atkluot,” stuosta režisors Daniils Zandbergs.

Projektu atbolsta: https://www.dlrr.eu

Režisors: Daniils Zandbergs

Scenografs, kostimu muokslinīks: MO-LU

Gaismu muokslinīks: Antons Andrejuks

Muzykalais nūformiejums: Aleksandrs Žedeļovs

Režisora asistents: Aleksandra Andrejuka

Lūmuos: Aleksandrs Domovojs, Karina Lamsone

>>>

5+

45 minutys

Krīvu volūdā, tiks nūdrūsynuots īskots saturā latvīšu volūdā

Eksperimentaluo skotive

Pyrmizruode: 2024. goda 5. oktobrī

‍