Bez dorba jis narūn sev mīra, bet klusums jam redzīs leidzvierteigs nuovei. Partū jam vysod koč kas juodora i nav ni minutys breivys. Juopīzeist, ka jam ir nalelys gryuteibys ar koncentriešonūs. Koč i tei nimoz nav vīneiguo bāda. Vysa itei dorbuošonuos ir bezjāgā – tukša jimšonuos, kam jis nikod nikuo napadora. Voi esit kod nabejs sasatykuši ar taidim cylvākim, kuri vysod ir aizjimti, tok eistineibā nikuo tai pa eistam nadora? Taids ir i myusu golvonais varūņs – Vilgešreja kungs.

Vilgešrejs ir pasūlejs sovys meitys rūku gruomatveža dālam, ari gruomatvežam, kurs varātu tikt par vierteigu paleigu juo pīaugūšajā (koč i eistyn īdūmuotajā) aizjimteibā. Tok Leonorys sirds pīdar cytam jaunekļam. Situaceju matās gluobt kolpyune Pernille, kurai padūmā ir viļteigs plāns, kab nūvārstu nalaimi i dabuotu, ka beiguos vystik uzvar mīlesteiba. Ironiskai, ka ituo plāna panuokuma atslāgs ir taišni Vilgešreja myužeiguo aizjimteiba.

Izruodis pamatā ir 18. g. s. īvārojamuokuo skandinavu autora, saukta ari par “dāņu Moljēru”, Ludviga Holberga luga. Itys īstudiejums byus ar delartiskuos komedejis elementim – ekspresivu akterspēli, spūdrim tālim, kostimim i grimu. Tū īstudej dāņu režisors Kims Bjarke, kurs 8 godus beja “Oslo Nye Teater” muokslinīcyskais vadeituojs, nu 1985. gods īstudējs ap 120 izruožu Skandinavejā, puorsvorā Dānejā i Norvegejā.

Tulkuojuma autore – Aļona Darskaja, tulkuojuma redaktore – Jevgenija Vorobjeva

Īstudiejums tūp ar Daugovpiļs vaļstspiļsātys pošvaļdeibys i Zīmeļvaļstu Ministru Padūmis biroja Latvejā atbolstu.

Pyrmizruode: 2026. gods 15. majā

Krīvu volūdā (titri latvīšu volūdā)

>>>

Titri

Titri latvīšu volūdā teik nūdrūsynuoti ar mobiluos lītuotnis “Teātru titri” paleidzeibu.

Lītuotnis izmontuošonai ir vajadzeigs škārsteikla pīslāgums. Teatrī ir vareiba pīsasalēgt teatra bezvodu škārsteiklam (Wi-Fi). Lītuotne izstruoduota tai, kab titru skaiteišona natraucātu apleicejūs.

Zamynluodej aplikaceju “Teātru titri” Google Play voi App Store.

‍

‍