26/9/2022

Tyvojās pyrmizruode mistiskai dramai „Latvīšu šausmu stuosti”

1.oktobrī Daugavpiļs teatrī nūtiks pyrmizruode režisora Georgija Surkova īstudeitīm „Latvīšu šausmu stuostim”, kur viestiejumi par cylvāku jyutom i attīceibom īteiti mistikys škidrautā.

„Myusu sabīdreibā volda Rītumu kulturys īspaiduots stereotipisks vīduklis par šausmu stuostim – vysūs viestiejumūs par spūkim, vampirym i cytim brīsmūnim plyst ašņa jyurys, i nikas lobs nav gaidams sasatikšonā ar taidu naradiejumu, kas gryb atjemt dzeiveibu,” stuosta izruodes režisors.  „Bet, struodojūt pi šuo īstudiejuma, mes sacynojam, ka latvīšu šausmu stuosti atsaškir nu rītumnīciskīm – nav tik bīdiejūši draudeigi, turkluot ai puordabiskū te var sadzeivuot i dažkuort pat sasadraudzētīs.”

Izruodes pamatā ir seši latvīšu autoru stuosti ar sižetim nu dažaidim laikim. Vīnā stūosteits par kaidu Centraltiergā pierktu vacu nūluodeitu spīgeli, cītā – par rogonom Zemgalis lelkungu zemēs, vēļ kaidā – par Reigys Mīra īlys Lelyjūs kopus sastūpamu nūslāpumainu byutni, kura savaldzynoj jaunu arhitektu i aizvad sev leidza nakts malnumā. Itymūs stuostūs brīsmis sliepjās škītami drūšuos vītuos, tyvūs ļaudīs vai poša cylvāka pruota rūtaļuos. Tok sovā byuteibā kotrs stuosts ir par cylvāku jyutom i attīceibom, kas var aizvest gon leidz brīsmeigim nūtykumim, gon izgluobt. Kas zyna, varbyut puordabiskīs na vīnmār isarūnās ai ļaunu nūdūmu, bet pavysam preteji –lai beidyunuotu i pasorguotu, tikai tū saprast cylvākam traucej bailes, i baiļu oklumā jis īskrīn nalaimes rūkuos.

Uz skotuves atsadzeivuosīs Aleksandra Grīna „Klusī cīmeņi” i „Vecaru Indrika dzeivesstuosts”, Mirdzys Bendrupis „Helena”, Viestura Reimera „Spīgeļs”, Vladimira Kaijaka „Vizija” i Ralfa Kokina „Engures kopsātys zyluo zuorka stuosts”. Stuostu viestiejumus izspēlēs aktīri Zanda Mankopa, Agnese Laicāne, Jūlija Ļaha, Kristīne Veinšteina, Egils Viļumovs, Ritvars Gailums, Marģers Eglinskis i Kārlis Tols.

Īstudiejuma vizualū nūformiejumu veidojūt, radūšuo komanda īvāruoja ekoteatra princypus, uz skotuves ūtrū elpu dūdama jau sovu laiku nūkolpuojušuom lītom – vacom kūka miebelem i dielim, kostimu nūlyktovā atrostim lītuotim apgierbim. Izruodes „Latvīšu šausmu stuosti” scenografs ir Andris Eglītis, kostimu muokslineica – Indra Bermaka, gaismu muokslinīks – Sergejs Vasiļjevs. Īstudiejuma muzykalū nūformiejumu veidoj komponists Platons Buravickis.

Pyrmizruode -1. oktobrī plkst. 18.00; nuokamuo izruode – 2. oktobrī plkst. 17.00.

Biļetes: Daugavpiļs teatra kasē ( 654 26520), „Biļešu paradīze” kasēs, taipat internetā www.bilesuparadize.lv