.jpg)
Daugavpiļs teatrī suokts dorbs pi psihologiskys dramys „Maly bez nūteikumim” īstudiejuma, kurā mīlesteibys treisstyurs izmontuots malu dobys pietnīceibai i dažaidom izpausmem dzeivī. Pyrmizruode nūtiks 14. apreļī.
Agrita atkluoj veira Roja nauzticeibu i suoc meklēt mīrynuojumu juo lobuokuo drauga apskuovīnūs. Lai napalyktu zaudeituojūs, mīlesteibys treisstyurī īsaisteitī izmontoj visus īspiejamūs leidzekļus – apzynuotis i najaušys manipulacejis, maldynuošonu, puspatīseibys, nūklusiejumus, atkluotus i nalīteigus malus. Tikai pagaidam nīvinam napīteik drūsmis pasavērtīs acīs patīseibai i byut atkluotam pošam pret sevi. Vysi gotovi dzeivot iluzejī, ka beistamuo spēle var turpynuotīs myužeigi.
Maly – naizbāgameiba, eislaiceigs gluobīņs vai laimeigys dzeivis prīkšnūteikums? Vai dzeive bez malym vyspuor īspiejama i kai mes radzom malu pastuoveišonu ikdīnā? Tī ir vīn daži nu daudzīm jautuojumim, uz kurym meklēs atbiļdi izruodes „Maly bez nūteikumim” varūni i jūs spielējušī aktīri. Caur stuostu par mīlesteibys treisstyuri izruodes veiduotuoji pietēs malu dobu i psihologiskos manipulacejis, kū cylvāki dīndīnā pīkūp na tikai sovstarpejuos attīceibuos, bet ari sabīdryskūs i politiskūs procesūs.
„Taipat kai dobā nav absoluti malnys i boltys kruosys, ari dzeivī teirā veidā napastuov pateiseiba vai maly. Ļūti bīži aiz itin kai acimradzamys patīsībys paslāpti kauč nalely, tūmār maly. Taidys situacejis narati pīradzom gon pryvātījā, gon sabīdryskījā dzeivī, manipulejūt ai cilvāka apziņi. Itei luga bezmoz ai palelynojamū styklu pietej manipulacejis veidus, kurus vīns cylvāks izmantoj pret ūtrū. Skateituojim byus īspieja tū vāruot vysūs seikumus, i varbyut iz skotuvis radzātīs nuokūtnē jīm paleidzēs eistā breidī atpazeit manipulaceji i krytiskuok viertēt ikvīnu informaceji – gon sovstarpejuos attīceibuos, gon publiskījā telpā īgyutū,”soka izruodes režisors Oļegs Šapošņikovs.
Izruodes pamatā ir Hermaņa Paukša luga „Striptizs”, kuru iztulkuojs Aleksandrs Komarovs. Kūpā ai Daugavpiļs teatra aktīrim Kristīnu Zaharovu i Aleksandru Komarovu izruodē spielej ari Staņislava Broka Daugavpiļs Muzykys vīdusskūlys aktīrkursa audzieknis Eduards Beļnikovs, kam šūgod kursu absolveišona. Izruodes scenografe – Inga Bermaka, kostimu muokslinīks – Gatis Timofejevs, gaismu muokslinīks – Sergejs Vasiļjevs. Izruode krīvu volūdā ai latviska tulkojuma ryndu. Iteicama par 16 godim vacuokim skateituojim.
Pyrmizruode – 14. apriļī plkst. 18.30; nokamuo izruode – 15. apriļī plkst. 18. 00.
Beleti Daugavpiļs teatra kasē ( 654 26520), „Biļešu paradīzes” kasēs, taipat internetā www.bilesuparadize,lv
Īstudiejumu atbolsta Baltijis Mediju izcileibys centrs.