1. oktobrī, kod gaismys breiži paliks jiutami eisuoki i kūpā ai rudiņa drāgnumu tyvuosīs dvēseļu dīnys, Daugavpiļs teatrī nūtiks ituos sezonys īvoda jaunīstudiejuma pyrmizruode – „Latvīšu šausmu stuosti” Georgija Surkova režijā.
Šausmu stuosti latvīšu literaturā nav bīža paruodeiba, bet šausmu žanrs teatrī jau pavysam ratums. Bet, pasateicūtīs Bārbalys Simsones 2016. godā sastuodeitījam kruojumam „Latvīšu šausmu stuosti”, kas gruomatneicā uzreizi pīsaistēja režisora Georgija Surkova uzmaneibu, Daugavpiļs teatra skateituojim byus izdeveiba na tikai īpazeitīs ar beidzamūs simts godu laikā latvīšu autoru tymsuokījā iztēles koktā dzymušīm nūtyukumim, bet ari pīdzeivuot uz skotuves attāluotūs sirdi styndzynūšūs atgadiejumu sajiutys.
Izruodē atsadzeivuosīs Aleksandra Grīna „Klusī cīmeņi” i „Vecaru Indrika dzeivesstuosts”, Mirdzys Bendrupes „Helena”, Viestura Reimera „Spīgeļs”, Vladimira Kaijaka „Vizija” i Ralfa Kokina „Engures kopsātys zyluo zuorka stuosts”. Saceriejumi aptver dažaidus laikus - mēra plūseišonūs godus, pūsmu pec Pyrmo Pasauļs kara i myusu dīnys. Vīns autors stuosta par Reigys Centraltiergā nūpierktu vacu nūluodeitu spīgeli, citi aproksta rogonys Zemgales lelkunga vaļdiejumūs i Mīra īlys Lelījūs kopus satyktu nūslāpumainu byutni, kura, savaldzynuojuse jauna arhitekta sirdi, aizvad veirīti nakts malnumā. I nu tuo, - soka režisors, - ka vyss nūteik navys ūtrā pasauļa molā, bet Reigā i tyvā apleicīņī, nu tuo ap sirdi vēļ baileiguok.
„Stuostu kruojumu īraudziejis, saprotu, ka saceriejumi unikaly i nūteikti juoīstudej. Daudzi nimoz nazyna, ka latvīšu literaturā ir taidi šausmu stuosti, kurus sarakstiejuši, pīmāram, klasiki Aleksandrs Grīns i Vizma Belševica. Lai gon pošam ir boguota skateituoja pīredze i šausmu žanrs pīsaista, uz skotuves taidys izruodes nabeju redzējis. Vīns nu īmeslym – moz materiala dorbam, pīdavom ir dīzgon sarežgeiti teatrī izveiduot ku pateišam bīdiejūšu. Īstudēt izruodi, kurys laikā skatietuojim nu bailem tierpst kauly, ir gon lels izaicynuojums, gon muna sen lūluota īcere, kū tagad suoku eistynuot,” stuosta režisors Georgijs Surkovs.
Kūpā ar Daugavpiļs teatra aktīrim Zandu Mankopu, Agnesi Laicāni, Jūliju Ļahu, Kristīni Veinšteinu, Egilu Viļumovu, Ritvaru Gailumu, Marģeru Eglinski izruodē spēlēs vīsaktīrs Kārlis Tols, kuram tāluošonys pīredze dažaidu teatru uzvadumūs, muokslys filmuos i augstškolu absolventu diplomdorbu eisfilmuos.
Izruodes „Latvīšu šausmu stuosti”scenografs ir Andris Eglītis, gaismu muokslinīks – Sergejs Vasiļjevs, bet muzykalais nūformiejums komponista Platona Buravicka veidots.
Pyrmizruode nūtiks 1. oktobrī plkst. 18.00, nuokamuo izruode – 2. oktobrī pl. 17.00.
Biļetes Daugavpiļs teatra kasē ( 654 26520), „Biļešu paradīze” kasēs, taipat internetā www.bilesuparadize.lv