Daugavpiļs teatrī tūp jau ūtrīs īstudiejums latgaliski šūsezon – gondreiži kriminala komedija „Divejis vyrtuvī, napīskaitūt nabašnīku” ( „Divas virtuvē, neskaitot līķi”) Oļega Šapošņikova režijā. Pyrmizruode nūtiks 25. februarī.
Tai pasauļs īkuortuots, ka sīvītes mīlesteibu jyut ai acim, bet veirīši ai muogu. I par kū gon vīns nu eista latgalīša īcīneituokajīm iedīnim navarātu byut golubcy jeb kuopustu teiteņi? Vyspuor jau golubcy saistuos ai gimines syltuma, muojeiguma i mīlesteibys sajyutu. Ja taidys nav tovā giminī, tu suoc meklēt aizvītojumus cytur. Izruodē divejom sīvītem juonūtāloj mīlūša muote i meita. Jūs miteklī vyss speid i laistuos, lai gon remonts i mebelis sen vairs nav pyrmuo svaiguma. Vyrtuvī plyudoj syltu kuopustu teiteņu garšeigīs smuords, bet obeju sīvīšu storpā jyutams sovaids ladainums i nauzticeiba. Pavysam dreiži īzarasīs jis – vīneigīs ituo vokora izruodes skaiteituojs, - i spēle varēs suoktīs.
Skateituojim tiks pīduovuots tragikomisks īstudiejums par divejom sīvītem, kurom liktins dzeives spēlē īdaliejs naveiksmeigys kartys, i par apskaužamu speitu pīvarēt vysys gryuteibys ari tod, ja nūtykumi pasagrīžās mozlīt kriminalā gultnī. Kod spēles bankā juoīlīk sova nuokūtne, tod ruodīs, ka izdareisi vysu cereibā, lai pīnuoktu dīna, kurā nikas nabyus juonūžāloj – ni lobīs, ni slyktīs. Dīmžāl par vysu juomoksoj, i nūriekinu cena reizem ir protam naaptverama. Kai taidā pasauļī saglobuot pašcīņu i napalikt par dzeives tiergā izlyktu preci?
Izruodes pamatā ir ukrainu dramaturga Aleksandra Mardaņa luga „Mātes un meitas” (oriģ. « Дочки-матери» ), kurys tekstu latgaliski puorlyukuse Kristīne Veinšteina. Leidz šam luga 2012. godā beja īstudeita Valmīrys Dramys teatrī Ineses Mičules režijā. Sovu pyrmū lugu odesīts Aleksandrs Mardaņs uzrakstēja pirms 20 godim; ņiu juo dorbi pīdzeivuojuši vairuok nakai 150 īstudiejumu 14 dažaiduos vaļstīs.
Izruodē spielej aktrisis Kristīne Veinšteina i Agnese Laicāne.
Pyrmizruode – 25. februarī plkst. 18.00; nuokamuo izruode – 26. februarī plkst. 15.00.
Biļetis: Daugavpiļs teatra kasē ( 654 26520), „Biļešu paradīze” kasēs, taipat internetā www.bilesuparadize.lv