21. oktobrī Daugavpiļs teatrī nūtiks pyrmizruode krīvu voludā gimines dramai „Īpašuo suga”, kam saturs bolstās Gunāra Priedes lugys „Zyluo” pamatā. Izruodes režisors – Ivars Lūsis.
Dramaturga Gunāra Priedes pyrms pīcdesmit godim uzraksteituo luga „Zyluo” pīskaitama juo daiļradis viersūtnēm, kur paaudžu attīceibu i dzeives jāgys motivi meistareigi saausti ai tautys atminis i identitatis tematim. Laika ritiejums tikai apstyprinoj, ka talanteigi uzraksteitīs tagad skaņ myusdīneigi, apstyprynodams autora spiejis ikdīnys dzeives plyudumā īlikt smolkys byutiskuo niansis. Muotes i dāla attīceibys, vainis apziņa i atbiļdeiba, spieja sadzierdēt i pīdūt, sovu sakņu apsazynuošonuos i tuoluokuo ceļa mekliejumi: itam vysam pīsaskoruos izruode „Īpašuo suga”, līkūt aizadūmuotīs par taidom ryupeigi globojomom vierteibom, kuru sorguošonai juopīlīk pyulis tautā, giminī i kotram sevī pošā.
„Luga ir daudzsluoņaina i sarežgeita kai poša dzeive; te vysim varūņim ir uzmaneibys vierti stuosti, tuopeic svareigi atrast kotrā īpašuos niansis. Sovukort pyrms pīcdesmit godim apraksteitī identitatis i tautyskuos pīdareibys mekliejumi taipat kai sovstarpejūs attīcību sarežgeituo doba pat storp škītami cīši tyvim cylvākim ir puorlaiceigys temys,” stuosta izrruodes režisors Ivars Lūsis.
Iruodes darbeiba raisās Gagrā, paguojušuo godsymta 70 – jūs godūs eisi pyrms jaunuo goda atnuokšonys. Divdesmitgadeigīs Juris vēļ arvīn naspiej atsakūptīs pēc tragiskuo autonagadiejuma. Ja breinums paleidzēs jam pīsaceļtīs kuojuos, vysa turpmuokuo dzeive varētu byut cytaida. Bet kai sasamīrynuotīs ai poguotni, ja, pošam nagrybūt, asi slapkova? Grybatūs suokt vysu nu jauna, atrast sevi, bet napamat vainis apziņa. Byutu ar kaidu juoparunoj nu sirds. Dīmžāl muote, tyvuokīs cylvāks, dīzyn vai saprūt poša sevi i nalaiž puori slīkšņam draudzeni, kura gotova uzklauseit.
Lūmuos: Vadims Bogdanovs, Irina Kešiševa, Jeļena Ņetjosina. Izruodes scenografs – Kristaps Skulte, kostimu muokslineica – Jūlija Ļaha, gaismu muokslinīks - Sergejs Vasiļjeva.
Giminis dramys „Īpašo suga” pyrmizruode nūtiks 21. oktobrī , plkst. 18.30; nuokamuo izruode – 22. oktobrī plkst. 18.00.
Biļetes : Daugavpiļs teatra kasē (654 26520) , „Biļešu paradīze” kasēs, taipat internetā www.bilesuparadize.lv