6.12.22

Mozīm skateituojim teatris pīduovoj izruodi latgaliski „Spreideits”

6. decembrī  Daugavpiļs teatris sovim jaunuokīm skateituojim cēla prīkšā   īstudiejumu „Spreideits” – pyrmū bārnim veiduotū izruodi latgaliski.

Kotrā sezonā Daugavpiļs teatris īstudej vysmoz vīnu izruodi latgalīšu volūdā.  Pādējūs godūs bejuši ari bilingvaly īstudiejumi jaunuokuo vacuma publikai ( „Roganeņa” i „Samsona ceļojums”),  kur latvīšu volūda mejuos ai latgaliskū paveidu.  Sovukuort „Spreideits” tagad ir bārnim dūmuota izruode, kur vysi runoj tikai latgaliski. Režisors Māris Korsiets  uzsver, ka „Spreideišam”  juo dzeivī pīdar īpaša vīta i nūzeime. Spredeits beja vēļ bierneibā juo pyrmuo nūspielietuo lūma, luga  „Spredeits” bija storp pyrmuom Daugavpiļs teatrī radzātuom izruodem, a ņiu pats jau režisors pyrmījam „Spreideiša” īstudiejumam latgaliski uz profesionaluos skotuves.

Annas Brigaderes puosoku lugys sižets ir labi zynoms vysim. Tuopēc radūšuo komanda puorlīcynuota, ka bārni ai  prīku vāruos golvonuo varūņa breineigūs pīdzeivuojumus i uztvers aktīru tālojumu ari bez latgalīšu volūdys prīkšzynuošonom, - tū jau pīruodēja skateituoju smīkly i cyta leidza dzeivuošonys atsauceiba zālī pyrmizruodes laikā.  Uzvadumu bogotyunoj etnoroka grupys  „Laimas muzykanti” vadeituoja Artūra Uškāna muzyka,  sovukuort latgaliskīs skaniejums ( A. Brigaderes tekstu latgaliski puorcāluse Monika Zīle)  izruodei pīškir papyldu sirsneibu i humora pierksti.

Augumā seikīs, bet  dūšā apjiemeigīs puika Spreideits dūdās pasaulī atrast vītu, kur kaļtejuos nauda i var dzeivuot laimeigs.  Ceļā jam juoiztur dažaidi nagaideiti puorbaudiejumi. Pasateicūtīs sovam gora spākam, apkiereibai i lobajai sirsneņai,   Spreideits  puorvar škērsļus i teik apbolvuots ai taidim īrūčym, kuri paleidz pīveikt pošu Nalobū!  Cauri raibīm pīdzeivuojumīm īdams, mozīs drūsminīks suoc saprast, ka sovu laimi ikvīns kaļ pats i laimeiguo zeme ir blokūs tyvuokīm cylvākim,  kas par tevi tur sirsneigu ryupi.

„As grybu ticēt, ka ceļuojums Spredeišam īmuoca pošu golvonū :  na jau boguoteiba dūd laimis sajyutu – tei dzeivoj tovā sirsneņī, tevī pošā. Pīteik sevī kauč kū maineit uz lobu, tai tuvleļ i puorsamejuos vyss ap tevi,” ar īstudiejuma gaitā rodušūs atziņi doluos aktrise Zanda Mankopa, kas izruodē tāloj Spreideiti.  

Izruodes „Spreideits” režisors ir Māris Korsiets, kostimu muokslinīks – Egils Viļumovs, scenografs – Kristaps Skulte, muzykaluo nūformiejuma autors – Artūrs Uškāns, horeografe – Anna Blakunova,  gaismu muokslinīks – Sergejs Vasiļjevs. Lūmuos:  Zanda Mankopa, Agnese Laicāne,  Kristīne Veinšteina, Maija Korkliša, Vanda Gibovska, Ritvars Gailums, Marģers Eglinskis, Jūlija Ļaha, Egils Viļumovs, Māris Korsiets, Inese Ivulāne – Mežāle, Kristīna Zaharova, Raimonds Paegle, Svetlana Morozova, Aleksandra Koguce, Anna Blakunova, Artjoms Afanasjevs, Jevgeņijs Mihailovs, Nikolajs Gedzjuns, Marks Šelutko.

Nuokamuos izruodes: 19., 20., 21. februarī  pulkst. 12.00.

Biļetes : „Biļešu paradīzes” kasēs vysā Latvijā, taipat internetā www.bilesuparadize.lv