14. aprilī Daugavpiļs teatrī nūtika pyrmizruode psihologiskai dramai „Maly bez nūteikumim” (rež. O. Šapošņikovs). Izruode par manipulacijom, malym i vysa tuo iznuokumu, verūtīs caur mīlesteibys trejstyura pryzmu.
Agrytys pasauļs sabryuk, uzzynūt par veira suonsūli, i sīvīte pījem lāmumu atsarībtīs, maklādama mīrynuojumu dzeivisbīdra lobuokuo drauga apskuovīņū s. Nivīns nagryb palikt zaudeituojs – suocās nažieleiga cīņa bez nūteikumiem, par golvonū īrūci izmontojūt malus. Malym klystūt par ikdīnu, nūsleikšana jūs otvorā draud ari vysizmaneiguokījam rūtaļnīkam.
„Luga nav melodrama. As saceitu – intelektuala drama, kur pamatā pruota spieles. Bet vyss, kas golu golā sanuok, ir ļaunpruoteigu manipulaciju rezultats, lai gon pyrmījā ocu uzmetīnī nav radzams nikas beistams vai nūsūdams. Maly, par kurym stuosts myusu izruodē, ir tikpat nažieleigi kai pajiemīņi beznūteikuma kauteņūs. Tūmār izruodes nūsaukums nav saisteits ai lugys saturu, bet leluokūtīs ai apstuokļim, kurūs mes dzeivojam. Maly i manipulacijis, taipat fake ziņis, niu nav uorpuskuortys paruodeiba, bet myusu ikdīna. Lai gan poša izruode ir par mīlesteibys trejstyury, uz skotuves radzamū – manupulacijis, emocionalū vardarbeibu, - mes varam projicēt uz kūpumā sabīdreibā nūteikūšū. Izruode cīši labi atainoj, kai spieleites ai napatīsu informaciju var cilvākus nūvest leidz katastrofai. Tuodēļ grybātum cerēt, ka izruode liks dziļuok paskateitīs uz ikdīnys nūtykumim i aizadūmuotīs, cik bīži mes poši varētu byut taidu nažieleigu malu i manipulaciju upuri,”soka izruodes režisors Oļegs Šapošņikovs.
Izruodis „Maly bez nūteikumim” topšonu atbalstieja Lelbritanijis viestnīceiba Latvijā, uzsverūt napīcīšameibu pīdūmuot par malu i dezinformacijis nūzeimi. Pyrmizruodes dīnā viestnīceibys puorstuovs Mihails Kozlovs atzeimēja, ka vīns nu viestnīceibys uzdavumim ir izveiduot i uzturēt dialogu ai vītejīm īdzeivuotuojim, veicynojūt daudzpuseigu sadarbeibu. „Izmontojūt radūšu vidi, vielējamēs nadaudz paeksperimentēt i suokt sarunu ai sabīdreibu, jemūt tolkā teatra volūdu. Itei sadarbeiba ir kai jaunys loppuses atškieršona, kuru cerom turpynuot, nuokūtnē diskusijuos īsaistūt teatra apmeklietuojus.”
Izruodes pamatā ir Hermaņa Paukša luga „Striptizs”, kuru iztulkoja Aleksandrs Komarovs. Kūpā ai Daugavpiļs teatra aktīrim Kristīnu Zaharovu i Aleksandru Komarovu izruodē pīsadoluos ari Staņislava Broka Daugavpiļs muzykys vydussskūlys aktīru kursa audzieknis Eduards Beļnikovs, kuram šūgod kursa izlaidums, taipat dejuotuoji Jevgeņijs Mihailovs, Vanda Gibovska, Miroslavs Blakunovs, Anna Blakunova. Izruodes scenografe – Inga Bermaka, kostimu muokslinīks – Gatis Timofejevs, horeografe – Irina Bogeruka, gaismu muokslinīks – Sergejs Vasiļjevs. Izruode krīvu volūdā ai titrym latviski. Nav īteicama par 16 godim jaunuokim skateituojim.
Nuokamuo izruode – 20. majā plkst. 19.00.
Beleti: Daugavpiļs teatra kasē ( 654 26520), „Biļešu paradīze”kasēs, taipat internetā www.bilesuparadize.lv
Iestudējums tapis ar Lielbritānijas vēstniecības Latvijā un Baltijas Mediju izcilības centra atbalstu.