4. martā Latgolys viestnīceibā GORS nūtyka svineiga Latgalīšu kulturys goda bolvys „Boņuks” padūšonys ceremoneja, kurā gūdynuoja bolvys īgivieju desmitnīku – nūzeimeiguokūs kulturys nūtykumus 2022. godā i ai tīm saisteituos personeibys, - i padeva bolvu par myuža īguļdiejumu. Storp „Boņuku 2022” sajēmušīm beja ari myusu „Spreideits” – pyrmais teatra īstudiejums bārnim latgaliski.
Daugavpiļs teatrys ik sezonu īstudej vysmoz vīnu izruodi, kurā skaņ latgalīšu volūda. Tai beidzamījūs godūs uz profesionaluo vaļsts teatra skotuves latgaliski izruodeits gon Šekspīrs i Gogolis, gon Trasuns. Sovukuort „Spreideits” ir pyrmo daugavpilīšu izruode bārnim latgaliski. Patīseibā vysai giminei skotams uzvadums, kurā mozuo laimis maklātuoja pīdzeivuojumus bogotynoj danči, dzīsmes i latgalīšim rakstureigīs sirds syltums i dzeives prīca.
Izruodes režisors Māris Korsiets soka paļdis žurijai par izruodeitū nūviertiejumu: „ Īstudejūt izruodes latgaliski, mes saglobojam itū latvīšu volūdys paveidu i veicynojom interesi par juo lītuošonu. Asmu gondareits, ka myusu nūvodā taidu virzīni saprūt i atbolsta. Maņ kai režisoram šei ir pyrmo bolva. Naaprakstoms prīks, ka „Spreideiti” pozitivi nūviertiejuši bārni Daugavpiļī i nūvodā i ļūti ceru, ka tikpat sirsneigi myusus apriļī uzjims ari Reigā.”
Gondariejums par apbolvuojumu arī rakstneicai Monikai Zīlei, kura izruodes vajadzeibai Brigaderes puosoku lugu puorlyka latgaliski: „Munupruot, Latgalīšu kulturys goda bolva kai dorba nūviertiejums ir cīši svareigs. Patīseibā nav nimoz tik daudz izruožu bārnim latvīšu volūdā, tuopēc vēļ jū leluoks prīks, ka ņyu uzvadums ari latgaliski. Pateikami apsazynuotīs, ka žurija „Spreideiti” pamanēja i nūvērtēja īstudiejumā īguļdeitū. Izruode pateišam breineigi kruošņa i byus labi saprūtama ari bārnim, kas latgaliski narunoj.”
Daugavpiļs teatrys, saceidams sirsneigu paļdis par nūviertiejumu, aicynoj giminis i skūlys izbaudeit „Spreideiša” pīviļceibu. Tyvuokuos izruodes: 29. i 30. martā, 9. i 14. majā Daugavpiļs teatrī; 2. apriļī - Latvejis Nacionalyjā teatrī.
Foto: Aktrise Agnese Laicāne, kas izruodē tāloj Līneiti i Meža muoti, nupat sajēmuse „Spreideišam” pīškiertū „Boņuku 2022”. ( Foto : Egita Jonāne.)
Video par izruodi: https://youtu.be/nmQnWran8-c