21. oktobrī uz Daugavpiļs teatra skotuves pyrmizruodi pīdzeivuoja režisora Ivara Lūša īstudiejums krīvu volūdā „Īpašuo suga”. Izruuodes pamatā lykta Gunāra Priedes luga „Zyluo” par muotes i dāla attīceibom pēc tragiska nūtykuma, kai ari obu mieginuojumim rast ceļu vīnam pi ūtra, cenšūtīs puorvarēt godu ritumā rodušūs bezdibiņi, kuru pylda vainis apziņa, aizvainuojumi i bailis palikt nasaprostam.
Pēc tragiskys autoavarijis Rasma vysu sovu laiku i uzmaneibu zīdoj divdesmitgadeiguo dāla Jura atlobšonai. Dzīdynuojumu i jaunu suokumu obi meklej Gagrā, Malnuos jyurys pīkrastī Kaukaza kolnu īlūkā, tūmār poguotnes nūtykumi i vainis apziņa nav pagaisuse, turpynoj dzeivuot obu dūmuos i plaisu attīceibuos namozynoj. Izaruodīs, svešam cylvākam atsakluotīs daudz vīgluok nakai sovam vīneigījam tyvinīkam, bet sirds nostys smogums tuopēc nadylst. Kai īsamuoceitīs saprast vīnam ūtru pec tam, kod jau puoruok daudz nūkavēts? Kai saleigt ai poguotni, ja, pošam nagrybūt, asi slapkova? Kur jemt spāku turpynuot dzeuvuot ai vainis apziņis cylpu par tyva cylvāka nuovi?
Gunārs Priede ir storp radzamuokajīm 20. godsymta ūtruos puses latvīšu dramaturgim. Sovukuort 1972. godā uzraksteituo luga „Zyluo” ir vīns nu juo izcyluokīm dorbim, kurā caur paaudžu konfliktu atspūguļuota sarežgeituo cylvāku attīceibu doba, vierteibu krīze sabīdreibā i dzeives jāgys mekliejumi. Aktrise Irina Kešiševa, kas izruodē spielej muoti Rasmu, stuosta, ka luoga jai saguoduojuse patīsu aktīrisku prīku – materials izcyls i pyrms pīcdesmit godim apraksteituos problemys ari myusu dīnuos nikur nav pazudušys:
„Sovstarpeju saskarsmi giminī daudzim taipat aizstuoj skriejīns pēc materialym lobumim i zyud dvieseļu syltums storp vystyvuokīm. Uz rūbeža, kod giminī cyts cytu vairs nadzierd – vacuoki bārnus, bārni tāvu i muoti, lauluotūs kūpdzeive kai svešinīkim, - var nūtikt vysaidys nalaimes. As ceru, ka myusu izruode liks nūpītni apdūmuot, kū kotram nu myusim nūzeimoj gimine: vai atrūnam laiku pasarunuotīs i sadzieržam saceitū, i vai vyspuor pazeistam mīlus cylvākus, ar kurim dzeivojam zam vīna jumta. Grybatūs dūmuot, ka izruode motivēs skateituojus sirsneiguokai saskarsmei giminī.”
„Leidz kaulam pajemušs psihologiskys dramys paraugs, kas caur vīnys giminis tragediju runoj par klyudom, puorprotumim, likteneigom najaušeibom, vīnaldzeigu egocentrysmu i kotra atbiļdeibu nūtykušajā nalaimē,” pēc pyrmizruodes īspaidus atkluoj skateituoja Inga Gedžūne.
Izruodē spielej Vadims Bogdanovs ( Juris), Irina Kešiševa ( Rasma), Jeļena Ņetjosina (Linda), Ivars Lūsis (Vidvuds). Izruodes scenografs – Kristaps Skulte, kostimu muokslineica – Jūlija Ļaha, video muokslinīks – Roberts Skulte, gaismu muokslinīks – Sergejs Vasiļjevs.
Nuokamuos izruodes: 11. novembrī plkst. 18.30; 21. i 22. decembrī plkst 18.30.
Biļetes : Daugavpiļs teatra kasē ( 654 26520), „Biļešu paradīze” kasēs, taipat internetā www.bilesuparadize.lv