4. augustā Daugavpiļs teatra kolektivs otkon sasatykuos, lai pēc teatra vaļdis prīkšsādātuoja Oļega Šapošņikova uzrunys i tradicyonaluos kūpeiguos fotobiļdis suoktu dorbu pi 2022/2023. goda sezonys jaunīstudiejumim.
Ari šūgod sezonu Daugavpiļs teatris īvoda ai daleibu starptautiskūs festivalūs. 3. augustā izruode „Cylvāks nu Podoļskys” beja skotama Vysaginys Telpu festivalā 2022 ( Visaginio erdviq festivalis 2022), sovukuort 9. septembrī uz festivalu „Trans/misijos Balticum” Traķūs dūsīs īprīkšejuos sozonys jaunīstudiejums „Vyspyrms beja…”
Ituos sezonys pyrmizruožu rindu atkluos režisora Georgija Surkova īstudeitī dzieslys styndzynūšī „Latvīšu šausmu stuosti”, kam pamatā ir seši latvīšy autoru saceriejumi: Aleksandra Grīna „Klusī cīmeņi” i „Vacuoru Indrika dzeives stuosts”, Mirdzys Bendrupes „Helena”, Viestura Reimera „Spīgeļs”, Vladimira Kaijaka „Vizija” i Ralfa Kokina „Enguris kopsātys zyluo zuorka stuosts”. Īstudiejums latvīšu volūdā, pyrmizruode 1. oktobrī.
Taipat oktobrī gaidoma pyrmizruode Gunāra Priedes lugys „Zyluo” īstudiejumam krīvu volūdā Ivara Lūša režijā. Novembrī pošus jaunuokūs teatra skateituojus īprīcynuos režisora Māra Korsieša latgaliski īstudeitīs „Spreideits”.
Bet 2023. goda īvodā sadarbeibā ai britu aktīri, režisoru, aktīrmeistareibys i skotuves runys pasniedzieji Polu Gudvinu ( Paul Goodvin) startēs starptautiskys projekts – Viljama Šekspira lugys „Makbets” īstudiejums originalvolūdā, pīsadolūtīs Daugavpiļs teatra aktīrim, Staņislava Broka Daugavpiļs Muzykys vydusskūlys studeju programys „Teatra muoksla” 2. kursa audziekņim i pīaicynuotim vīsmuokslinīkim.
Biļetes uz septembra izruodem jau ir puordūšonā, nūpierkamys vysuos „Biļešu paradīze” kasēs Latvijā, taipat internetā www.bilesuparadize.lv
Foto: Džeina Saulīte