27. aprilī Daugavpiļs teatrī pyrmizruodi pīdzeivuoja Aleksandra Vampilova komedijis „Vacuokīs dāls” īstudiejums par tāvu i bārnu attīceibom, vīntuleibu i sapratnis ilgom, par ciļvieceibu i pīdūšonu.
Izruodē „Vacuokīs dāls” izdzeivojam divejis dīnys Sarafanovu giminī, kur nagaideitu cīmeņu īsarašonuos vysu apgrīž ai kuojom gaisā. Lai svešā piļsātā atrostu pajumti nakts puorlaišanai, Busygins i Siļva izdūmoj viļteibu – najaušam nomatāvam paziņoj, ka Busygins ir jū apcīmuot īsaradīs uorlauleibys dāls. Tok jau pyrmījuos vīseibu stuņdēs Busyginam grybūt nagrybūt juopīsaslādz sovys „jaunuos gimines” problemom i ai kotru breidi jam pīaug saprašona, ka no itīm cylvākim škiertīs bys gryuts. Tai vīnai naktej patvārumu mekliejs viļtinīks puors dīnuos daboj kū daudz vierteiguoku – gimini. Bet pošam juoizlem: bēgt i vysu aizmierst voi riskēt, atsazeistūt cereibā sajimt pīdūšonu.
Apmeklejūt izruodi, skateituojim rūnās īspieja lobuok īpazeit teatra „jaunū ašņi” – vairuokumu lūmu te spielej Staņislava Broka Daugavpiļs Muzykys vydusskūlys aktīru kursa tūpūšī absolventi. Kai atzeimej aktīrkursa vadeituojs, teatra direktors Oļegs Šapošņikovs, Aleksandra Vampilova luga „Vacuokīs dāls” ir augstvierteiga dramaturgija bez ūtruo plāna lūmom – kotra varūņa stuosts daudzkuortains i saistūšs. Sovukort tūpūšī aktīri, muoceibu laikā stuodojūt ai lugys fragmentim, prota tik puorlīcynuoši īsadzeivuotīs Vampilova uzraksteitojūs varūņūs, ka īdvesmoja lugys pylnvierteigai īstudeišonai i paruodeišonai Daugavpiļs teatra skateituojim. Diplomdorba izruode tagad īlykta repertuarā i byus skotama ari nuokamījā sezonā.
Īstudiejuma „Vacuokīs dāls” režisors ir Edgars Māliņš, vīns nu aktīru kursa pedagogim – sovulaik Moskovys Akademiskuo Dailes teatra ( MHAT) skūlā- studijā vuiciejīs daugavpilīts. Izruodes muokslinīciskīs vadeituojs – Oļegs Šapošņikovs. Izruodes scenografs – Egils Viļumovs, kostimu muokslinīks – Gatis Timofejevs, gaismu muokslinīks – Sergejs Vasiļjevs.
Lūmuos: Mihails Samodahovs ( Sarafanovs), Miroslavs Blakunovs ( Busygins), Vladislavs Vasiļjevs ( Silva), Kristina Tiško ( Ņina), Artjoms Afanasjevs ( Vaseņka), Aleksandra Koguce ( Makarska), Jevgeņijs Mihailovs ( Kudimovs).
Izruode krīvu volūda. Eksperimentaluo zāle, ilgums 2 stuņdes 20 minutu ( ai storpbreidi). Tymā skateituojus sagaida Daugavpiļs teatrī vēļ nikod īprīkš napīdzeivuots ai ceļojumu laikā saisteits puorsteigums
Itymā sezonā izruodi „Vacuokīs dāls” varēs nosaskateitīs 30. aprilī plkst. 17.00, 6. majā plkst 17.00 i 20. majā plkst. 15.00. Vysi beleti izpuordūti.
Foto - Gatis Timofejevs