5.4.22

„Cabaret Dinabourg” – nakts kulturys dzeivis uzplaukums Daugavpilī

Jau pavysam dreiži Daugavpiļs piļsātys kulturys dzeivī  nūtiks apvārsums i vēļ nikod agruok nabejis pasuokums. 22. apreļī Daugavpiļs teatris, izīdams nu teatram pīrostuo repertuara rāmom, pīduovoj skateituojim ilgi auklāta projekta pyrmizruodi – „Cabaret Dinabourg”.

Kulturys dzeivei piļsātā nav juoaizmīgst reizē ar tymsys īsastuošonūs.  Pasauļs zyna daudz piļsātu, kur kvalitativa naksneiguo izklaide ir pīrosta līta i pat soldona ūdzeņa, - kai byutu juosoka par kabareja žanru. Niu ari Daugavpilī byus īspēja baudeit augstvierteigu kabareja muokslu ar 21. godusymtam atbiļsteigu saturu – bez banaluo kankana, bet ar valdzynūšu muzyku i dejom, golvu reibynūšim trikim i kruošnym tārpim.  Ar vysu itū Daugavpiļs teatris atdzeivynoj nakts izklaižu pīmierstuos tradicejis i, pīvīnojūt myusdīneibu, uzduovynoj sovai piļsātai jaunu pīredzi. Kai  apstyprynojums tam ir kabareja uzvaduma nūsaukumu rūtojušīs  piļsātys vēsturiskīs vuords.

„Cabaret Dinabuorg” uzvaduma laikā Daugavpiļs teatra leluo zāle izamainēsīs leidz napazeišonai. Parterā sāduvītys bys pi goldym,  balkonā – kai pīrosts. Juopīzeimej, ka partera biļetes cenā īkļauts pasuokuma laikā baudams kompliments nu teatra. Stuņdi pyrms pasuokuma i storpbreidī bys apkolpuošona pi goldym, struoduos ari teatra kafeineica.

„Cabaret Dinabourg” programys vadeituoji – aktīri Aleksandrs Komarovs, Zanda Mankopa, Jeļena Ņetjosina i Ritvars Gailums. Pasauļslavonys dzīsmis izpiļdēs myusu pošu talanteigī muokslinīki, Daugavpiļs teatra aktīrus īskaitūt. „Cabaret Dinabuorg” skateituoji satiks Kristīnu Zaharovu, Natāliju Kotonu, Alisu May, Marku Šelutko, Alinu Kalinu, Luīzu Prokofjevu, Artjomu Afanasjevu, Vandu Gibovsku, Jevgeņiju Mihailovu, Svetlanu Morozovu, Raimondu Paegli, Darju Šakalovu, Milenu Savkinu, Aleksandru Koguci, Alisu Matvejevu, Miroslavu Blakunovu, Otto Kovči, Arturu Rudzīti.

„Cabaret Dinabourg” režisors – Oļegs Šapošņikovs, programys libreta autors – Aleksandrs Komarovs,  horeografe – Irina Bogeruka, scenografe i kostimu muokslineica – Inga Bermaka, gaismu muokslinīks – Sergejs Vasiļjevs.

Pasuokums  - latvīšu i krīvu volūdā, skateituoju vacuma īrūbežojums – nu 16 godu. Uzvaduma ilgums – 2 stuņdes 30 minutu  ( ar storpbreidi).

„Cabaret Dinabourg” pyrmizruode nūtiks 22. apreļī pl. 20.00. Jaunradeituos kabareja programys atkuortuojums – 23. apreļī pl. 20.00, 24. apreļī pl. 19.00, 20. i 21. majī pl. 20.00.

Biļetes – Daugavpiļs teatra kasē ( 654 26520), „Biļešu paradīzē”, taipat internetā www.bilesuparadize,lv