Apriļa suokumā Daugavpiļs teatrys ai trejom izruodem vīsuosīs Latvijis Nacionalajā teatrī. Reidzinīkim gaidamyus eistan latgaliskys breivdīnys: vīnys nedeļis izskaņā byus īspieja baudeit gon muzykalu puosoku pīaugušīm latvīšu i latgalīšu volūdā „Pa Laimes luoča pādom”, gon izruodi „Spreideits” vysai giminei latgaliski. Sovukuort 3. apriļī uz Latvijis Nacionaluo teatra skotuves atkuortuoti vīsuosīs muzykaly dramatiska izruode „Paradīze”, kas veiduota pec Raimonda Paula muzykla „Dāmu paradīze” motivim, i pi klavīrem sūlās byut pats Maestro.
Muzykaluo puosoka pīaugušīm „Pa Laimes luoča pādom” ( rež. O. Šapošņikovs) veiduota pec Andreja Upīša stuosta „Sūnu ciema zēni”motivim i bolstās uz puosoku lykumim – senī laiki pameišim ai tagadni, i daži breinumi kai parosta ikdīna. Taipat kai originalsaceriejumā ari izruodē syuncīmīši dūdās meklēt Laimes luoci, lai ar jyo paleidzeibu izgluobtu sovu cīmu nu godim ilguša pagrymuma. Burvu navigators brauciejus izvodoj pa vairuokom Eiropys vaļstim, pīduovojūt skateituojim muzykalu ceļuojumu i lobu īspieji puordūmuot laimes saturu i vierteibu. Izruodē skaņ Valta Pūces muzyka Reiņa Sējāna aranžiejumā. Kūpā ai Daugavpiļs teatra trupu īstudiejumā pīsadoluos Jānis Jarāns, Ilona Bagele, Dainis Skutelis i Atis Ieviņš. Izruode nūtiks 1. apriļī plkst. 18.00.
Sovukuort 2. apriļī byus īspieja nūsaskateitīs pyrmū Daugavpiļs teatra īstudiejumu bārnim latgaliski „Spreideits” (rež. M. Korsiets). Izruode izvirzeita Latgalīšu kulturys goda bolvai „Boņuks 2022”. A. Brigaderes puosoku lugys sižets par mozū i vysnūtaļ drūsmeigū laimes maklātuoji vysim labi zynoms, tuodeļ radūšuo komanda puorlīcynuota, ka skateituoji ai prīcu ļausīs naparostījam pīdzeivuojumam teatrī i pat bez latgalīšu volūdys prīkšzynuošonom nivīnam nabyus gryuteibu sekuot nūtykumim uz skotuves. Izruodi papyldynoj etnoroka grupys „Laimas muzykanti” vadeituoja Artūra Uškāna muzyka, bet volūdys latgaliskīs skaniejums ( lugu latgaliski puorlykuse Monika Zīle) uzvadumam dūd papyldu sirsneibys i humora pierksti. Izruode nūtiks plkst. 12.00 i plkst 15.00.
Vīsizruodes Reigā Daugavpiļs teatris nūslēgs 3. apriļī ai bilingvalu ( latvīšu i krīvu vol.) muzykaly dramatisku īstudiejumu „Paradīze” , kurā teatra trupu papyldynoj soliste Ilona Bagele i aktīrs Rihards Lepers, sovukuort pi klavīrem byus pats Maestro. „Paradīze” ir unikala izruode, kuru režisors Oļegs Sapošņikovs pārn īstudēja par gūdu desmitgadei kūpš mūzykla „Dāmu paradīze” pyrmizruodes Daugavpiļs teatrī, izveiduodams muzykalu ceļojumu muzykla tapšonys viesturī. Izruodes pamatā ir Emīla Zolā 1883. godā uzraksteitīs mīlesteibys stuosts par vīnkuoršu meitini, kas īkaroj tūs laiku Parīzes leluokuo veikala īpašnīka sirdi. Sižetu papyldynoj ai romana zamteksta viestiejumim saisteitu puordūmu atkuopis i pīskuorīni mūzykla tapšonys nūtykumim. Bet golvonuo lūma īstudiejumā, prūtams, Raimonda Paula muzykai. Izruode plkst. 19.00.
Biļetis uz Daugavpiļs teatra vīsizruodem Reigā jau ir puordūšonā „Biļešu paradīze” kasēs vysā Latvijā, taipat www.bilesuparadize.lv
